ആലപ്പുഴ ജില്ലയിലെ പല്ലന ആസ്ഥാനമാക്കി പ്രവർത്തിക്കുന്ന കുമാരനാശാൻ സ്മാരക സമിതിയുടെ ചെയർമാനായി കവിയും ഗാനരചയിതാവുമായ രാജീവ് ആലുങ്കലിനെ നിയമിച്ചു.
നൂറോളം ചിത്രങ്ങൾക്കു ഗാനരചന നിർവ്വഹിച്ചിട്ടുള്ള രാജീവ് ആലുങ്കൽ കഴിഞ്ഞ കാൽനൂറ്റാണ്ടായി സാംസ്കാരിക രംഗത്തു സജീവമാണ്. നാടക രംഗത്തും സാഹിത്യ രംഗത്തും വ്യക്തിമുദ്ര പതിപ്പിച്ച പ്രതിഭയാണ്. 200ൽ അധികം നാടക ഗാനങ്ങളും 2500 ഓളം ആൽബം ഗാനങ്ങളും രാജീവ് ആലുങ്കൽ രചിച്ചിട്ടുണ്ട്.
നിലവിളിത്തെയ്യം, എന്റെ പ്രിയ ഗീതങ്ങൾ, വേരുകളുടെ വേദാന്തം എന്നീ പുസ്തകങ്ങളും രചിച്ചു. 2004ൽ മികച്ച നാടകഗാന രചയിതാവിനുള്ള സംസ്ഥാന സർക്കാരിന്റെ പുരസ്കാരം ലഭിച്ചു. 2012ൽ സമഗ്ര സംഭാവനയ്ക്കു കേരള സംഗീത നാടക അക്കാദമിയുടെ കലാശ്രീ പുരസ്കാരവും ലഭിച്ചു.