ലോസ് ആഞ്ചലസ്∙ മികച്ച സംവിധായകൻ അടക്കം നാമനിർദേശം ലഭിച്ച ഏഴു വിഭാഗങ്ങളിലും പുരസ്കാരങ്ങൾ നേടി ‘ലാ ലാ ലാൻഡ്’ ഗോൾഡൻ ഗ്ലോബ് അവാർഡ് നിശയിൽ ചരിത്രമായി. ഹോളിവുഡിന്റെ പശ്ചാത്തലത്തിലുള്ള ലാ ലാ ലാൻഡ്, പ്രണയവും സംഗീതവും നിറഞ്ഞ കോമഡിയാണ്. സംവിധാനം: ഡേമിയൻ ഷസെൽ.
സിനിമയിലെ നായികാനായകൻമാരായ റയാൻ ഗോസ്‌ലിങ്ങും എമ്മ സ്റ്റോണും കോമഡി വിഭാഗത്തിൽ മികച്ച നടനും നടിയുമായി. മികച്ച സംഗീതസംവിധാനത്തിനും ഗാനരചനയ്ക്കുമടക്കം ഏഴു പുരസ്കാരങ്ങളാണു ലാ ലാ ലാൻഡ് നേടിയത്.
ആറു നാമനിർദേശങ്ങൾ ലഭിച്ചുവെങ്കിലും മികച്ച സിനിമയ്ക്കുള്ള (ഡ്രാമ) പുരസ്കാരം മാത്രമാണ് ‘മൂൺലൈറ്റ് ’നേടിയത്. മാഞ്ചസ്റ്റർ ബൈ ദ് സീ എന്ന ചിത്രത്തിലെ അഭിനയത്തിന് കെയ്സി അഫ്ളെക് മികച്ച നടനുള്ള (ഡ്രാമ) പുരസ്കാരം നേടി.
മികച്ച നടി (ഡ്രാമ) യ്ക്കുള്ള പുരസ്കാരം ഇസബെൽ യുപേർ നേടി (ചിത്രം: ‘എൽ’). മികച്ച വിദേശഭാഷാ ചിത്രത്തിനുള്ള പുരസ്കാരം ‘എൽ’ നേടി.