കൂറ്റൻ മഞ്ഞു സുനാമിയുടെ ഭീകര ദൃശ്യങ്ങൾ സമൂഹമാധ്യമങ്ങളിൽ ചർച്ചയാകുന്നു. ഫ്രാൻസിലെ അവലാൻഷെയിൽ ഫ്രഞ്ച് ആൽപ്സിൽ പ്രവർത്തിക്കുന്ന ടിഗ്നസ് സ്കൈ റിസോർട്ടിനു സമീപമാണ് അപകടം നടന്നത്. മഞ്ഞുമലയിടിഞ്ഞ് താഴേക്കു വരുന്നതിന്റെയും ആളുകൾ ഓടി രക്ഷപെടുന്നതിന്റേയും ദൃശ്യങ്ങളാണ് സമൂഹമാധ്യമങ്ങളിൽ ചർച്ചയായത്.
തിരമാലയ്ക്കു സമാനമായി മഞ്ഞുമല പാഞ്ഞു വരുന്നതാണ് ദൃശ്യങ്ങളിൽ കാണാൻ കഴിയുക. സംഭവത്തിൽ റോഡും അവിടെയുണ്ടായിരുന്ന വാഹനങ്ങളും മഞ്ഞിൽ പുതഞ്ഞുപോയി. മഞ്ഞിടിഞ്ഞു വരുമ്പോൾ റോഡിൽ നിൽക്കുന്നവർ രക്ഷപെടാനായി ഓടുന്നതും ദൃശ്യങ്ങളിൽ വ്യക്തമാണ്. സമീപമുണ്ടായിരുന്ന ബാപ്റ്റിസ് ചസാങാണ് ഈ ദൃശ്യങ്ങൾ പകർത്തിയതും സമൂഹമാധ്യമങ്ങളിലൂടെ പങ്കുവച്ചതും. അപകടത്തിൽ ആർക്കും പരിക്കേറ്റിട്ടില്ല. ബാപ്റ്റിസ് പകർത്തിയ ഈ ദൃശ്യങ്ങൾ ഇതുവരെ ഒന്നരലക്ഷത്തോളം ആളുകൾ കണ്ടുകഴിഞ്ഞു.
