ട്രഡീഷണൽ ശൈലിയിലുള്ള തറവാട് വീടിനെ കൊളോണിയൽ ശൈലിയിലേക്ക് മാറ്റിയെടുത്തപ്പോൾ...
മലപ്പുറം കൊണ്ടോട്ടിയിലുള്ള മുപ്പതു വർഷം പഴക്കമുള്ള ഒരു മുസ്‌ലിം തറവാടായിരുന്നു ഇത്. ചുറ്റിനും ധാരാളം വരാന്തകളുള്ള തറവാടിന്റെ താഴത്തെ നില ഒറ്റ ഹാൾ ആയിട്ടായിരുന്നു പണിതത്. കിടപ്പുമുറികൾക്ക് സ്ഥലലഭ്യത കുറവായിരുന്നു. നേർത്ത പ്രകാശം മാത്രമേ അകത്തേക്ക് എത്തുമായിരുന്നുള്ളൂ. സ്വീകരണമുറിയോ ഊണുമുറിയോ വേർതിരിച്ചിരുന്നില്ല. അങ്ങനെ പരിമിതികൾ എറിയപ്പോഴാണ് ഉടമസ്ഥൻ പുതുക്കിപ്പണിയെ കുറിച്ചു ചിന്തിച്ചത്.
പഴയ വീട് തറവാടിന്റെ പഴമ നിലനിർത്തിക്കൊണ്ടുള്ള പുതുക്കിപ്പണിയാകണം എന്നതും ആവശ്യമായിരുന്നു. അതിനാൽ പുറംഭിത്തികളിൽ അധികം മാറ്റങ്ങൾ വരുത്താതെ ഇന്റീരിയറിലെ ഭിത്തികളുടെ പുനർക്രമീകരണത്തിലൂടെയാണ് സ്ഥലലഭ്യത ഉറപ്പുവരുത്തിയത്. 1750 ചതുരശ്രയടിയാണ് വിസ്തീർണം.
പുറംകാഴ്ചയിൽ ഒരു കൊളോണിയൽ പ്രൗഢി കൂടി കൊണ്ടുവരാൻ ശ്രദ്ധിച്ചിട്ടുണ്ട്. അതിനുവേണ്ടി വൈറ്റ്+ ഗ്രേ പെയിന്റാണ് പുറംഭിത്തികളിൽ അടിച്ചത്. കൂടാതെ മുൻപിലെ ജനാലകൾക്കും വാതിലുകൾക്കുമെല്ലാം വൈറ്റ് പിയു പെയിന്റ് ഫിനിഷ് നൽകി. അങ്ങനെ കൂടുതൽ കാലം ഈർപ്പവും പായലുമേൽക്കാതെ വീടിന്റെ കാഴ്ച നിലനിൽക്കും എന്നുറപ്പുവരുത്തി.
സിറ്റ്ഔട്ടിന്റെ ഗ്രില്ലുകളും പുറംഭിത്തികളിലെ ഗ്രൂവുകളും ഡോർമർ ശൈലിയിലുള്ള കിളിവാതിലുകളുമെല്ലാം കൊളോണിയൽ ശൈലി വിളിച്ചോതുന്നു.
പുതുക്കിപ്പണിക്കുശേഷം താഴത്തെ നിലയിൽ സ്വീകരണമുറിയും ഊണുമുറിയും പ്രത്യേകമായി വേർതിരിച്ചു. വിശാലമായ രണ്ടു കിടപ്പുമുറികൾ വന്നു. അറ്റാച്ഡ് ബാത്റൂം, വാഡ്രോബ് എന്നിവയെല്ലാം ഇവിടെ ഒരുക്കി. പ്രകാശത്തെ അകത്തേക്ക് ആനയിക്കാനായി ധാരാളം ജനാലകളും ഒപ്പം ക്രോസ്സ് വെന്റിലേഷനും നൽകി. അതോടെ അകത്തളങ്ങൾ കൂടുതൽ സജീവമായി.
തടി കൊണ്ടുള്ള മച്ചാണ് താഴത്തെ നിലയിൽ മേൽക്കൂരയെ അടയാളപ്പെടുത്തുന്നത്. ജനാലകൾക്കും വാതിലുകൾക്കും പഴയ തടി പുനരുപയോഗിച്ചു എന്നതും ശ്രദ്ധേയമാണ്. തടി കൊണ്ട് മിനിമൽ ശൈലിയിലാണ് ഗോവണി. ജിഐ മെറ്റൽ ഫ്രയിമുകൾ കുത്തിനിർത്തിയുള്ള കൈവരിയുടെ ഡിസൈനും ശ്രദ്ധേയമാണ്. എട്ടുപേർക്കിരുന്നു ഭക്ഷണം കഴിക്കാൻ പാകത്തിൽ വിശാലമായ ഊണുമേശ.
ലളിതമായ അടുക്കള. ഇതിനു സമീപമുള്ള വർക്ക് ഏരിയയിൽ സ്ത്രീകൾക്ക് ഒത്തുകൂടി സൊറ പറഞ്ഞിരിക്കാൻ വരാന്തയും ചെറിയൊരു പാൻട്രി സ്‌പേസും ഒരുക്കി. ഊണുമുറിക്ക് സമീപം ഒരു പ്രെയർ ഏരിയ, സ്വീകരണമുറിയോട് ചേർന്ന് ഒരു റീഡിങ് സ്‌പേസ് എന്നിവയും സജ്ജീകരിച്ചു.
ബലക്ഷയം വന്ന തടികൊണ്ടുള്ള കഴുക്കോലുകൾ മാറ്റി ജിഐ ഫ്രയിമുകൾ നൽകി. മേൽക്കൂരയിലെ പഴയ കളിമൺ ഓടുകൾ പോളിഷ് ചെയ്തു പുനരുപയോഗിച്ചതോടെ വീട് പുതിയ കാലത്തിന്റെ ക്‌ളാസ് ലുക്കിലേക്ക് തിരിച്ചെത്തി. ചെടികളും മാവും പ്ലാവും മറ്റു ഫലവൃക്ഷങ്ങളുമൊക്കെ വീടിനു തണൽ വിരിക്കുന്നു.
Project details
Location - Kondotty , Malappuram
Owner - Shahul Hameed
Project type - Renovation
Project style - Colonial
Area - Ground floor - 1650sqtf, FF floor - 600sqtf
Designer- Arun NV
Yuuga Designs, Malappuram
Mob- 8943661899
email- yuugadesigns@gmail.com
നിങ്ങളുടെ വീട് മനോരമ ഓൺലൈനിൽ പ്രസിദ്ധീകരിച്ചു കാണാൻ ആഗ്രഹമുണ്ടോ? നല്ല ചിത്രങ്ങളും ചെറുവിവരണവും മൊബൈൽ നമ്പറും സഹിതം customersupport@mm.co.in എന്ന ഇമെയിൽ വിലാസത്തിലേക്ക് അയച്ചു തരൂ...
