ഇൗ പ്രകാശൻ എന്റെ അയൽപക്കത്തുകാരനല്ലേ..? ചിലപ്പോഴൊക്കെ ഞാൻ തന്നെയല്ലേ ഇൗ പ്രകാശൻ. ഫഹദ് ഫാസിൽ ചിത്രം ഞാൻ പ്രകാശന്റെ ടീസർ കണ്ട ഏതുമലയാളിയുടെയും മനസിലൂടെ ആദ്യം കടന്നുപോയ ചിന്തകൾ ഇതാവും. സ്വാഭാവികാഭിനയത്തിന്റെ പുതിയ തലം സമ്മാനിക്കുകയാണ് ഫഹദിന്റെ പ്രകാശൻ. ഫഹദ് ഫാസിലിനെ നായകനാക്കി സത്യൻ അന്തിക്കാട് സംവിധാനം ചെയ്യുന്ന ‘ഞാന്‍ പ്രകാശന്‍’ എന്ന ചിത്രത്തിന്റെ ടീസർ സോഷ്യൽ ലോകത്ത് തരംഗമാകുന്നു.
‘ഒരു ഇന്ത്യന്‍ പ്രണയകഥ’യെന്ന വിജയചിത്രത്തിനു ശേഷം സത്യന്‍ അന്തിക്കാടും ഫഹദ് ഫാസിലും കൈകോര്‍ക്കുന്ന ചിത്രമാണ് ‘ഞാന്‍ പ്രകാശന്‍’. പതിനാറു വര്‍ഷങ്ങള്‍ക്ക് ശേഷം ശ്രീനിവാസന്റെ തിരക്കഥയില്‍ സത്യന്‍ അന്തിക്കാട് സംവിധാനം ചെയ്യുന്ന സിനിമ എന്ന സവിശേഷതയും ഈ ചിത്രത്തിനുണ്ട്. ഒരു സാധാരണനാട്ടിൻ പുറത്തുകാരന്റെ പരദൂഷണവും ചേഷ്ടകളുമായി കളം നിറയുകയാണ് ഫഹദ്. ഈ കഥാപാത്രത്തില്‍ സമാനമായ മുന്‍ കഥാപാത്രത്തെ ആവര്‍ത്തിക്കാതിരിക്കാന്‍ ഫഹദ് ശ്രദ്ധിച്ചിട്ടുണ്ടെന്ന് ടീസര്‍ വ്യക്തമാക്കുന്നുമുണ്ട്.
‘മലയാളിക്ക് കണ്ടു പരിചയമുള്ള ഒരു ടിപ്പിക്കല്‍ മലയാളി യുവാവാണ് പ്രകാശന്‍’ എന്നാണ് സംവിധായകന്‍ ‘പ്രകാശ’നെ വിശേഷിപ്പിച്ചത്. ഗസറ്റില്‍ പരസ്യം ചെയ്ത് പ്രകാശന്‍ എന്ന പേര് ‘പി.ആര്‍.ആകാശ് ‘ എന്നു പരിഷ്‌കരിക്കുന്ന കഥാപാത്രമായാണ് ഫഹദ് എത്തുന്നത്.’അരവിന്ദന്റെ അതിഥികള്‍’, ‘ലവ് 24X7’ എന്നീ ചിത്രങ്ങളിലൂടെ മലയാളിക്ക് സുപരിചിതയായ നിഖില വിമല്‍ ആണ് ചിത്രത്തിലെ നായിക. സലോമി എന്ന കഥാപാത്രത്തെയാണ് നിഖില അവതരിപ്പിക്കുന്നത്. ചിത്രത്തില്‍ ഒരു പ്രധാന റോളില്‍ ശ്രീനിവാസനും എത്തുന്നുണ്ട്. ഗോപാല്‍ജി എന്നാണ് ശ്രീനിവാസന്റെ കഥാപാത്രത്തിന്റെ പേര്.
ഫുള്‍ മൂണ്‍ സിനിമയുടെ ബാനറില്‍ സേതു മണ്ണാര്‍ക്കാട് നിര്‍മിക്കുന്ന ഈ ചിത്രത്തിന്റെ ക്യാമറാമാന്‍ എസ്.കുമാറാണ്. ഷാന്‍ റഹ്മാന്റേതാണ് സംഗീതം. ചിത്രം ക്രിസ്മസിന് തിയറ്ററുകളിലെത്തും.