ഗായകൻ പാലാഷ് സെൻ സഞ്ചരിച്ച ഹെലികോപ്ടർ മോശം കാലാവസ്ഥയെ തുടർന്ന് റോഡിൽ ഇറക്കി. ആസാമിലെ ഗോഹ്പൂർ ടൗണിനടുത്തുള്ള ൈഹവേയിലാണ് കോപ്ടർ ഇറക്കിയത്. ആന്ധ്രപ്രദേശില്‍ നിന്നും ഗുവാഹത്തിയിലേക്ക് സഞ്ചരിക്കുപ്പോൾ ശക്തമായ കാറ്റുണ്ടായി. അപകടം മണത്തതിനെത്തുടർന്ന് ഹെലികോപ്ടർ താഴെ ഇറക്കുകയായിരുന്നു. സെന്നിന്റെ ബാൻഡ് അംഗങ്ങളും കോപ്ടർ ജീവനക്കാരും ഉൾപ്പെടെ 24 പേരാണ് ഉണ്ടായിരുന്നത്. കോപ്ടറിൽ ഉണ്ടായിരുന്നവർ സുരക്ഷിതരാണ്.
അപകട വിവരം ഫെയ്സ്ബുക്കില്‍ കുറിച്ച സെൻ ഹെലികോപ്ടറിന്റെ ചിത്രങ്ങളും പോസ്റ്റ് ചെയ്തിട്ടുണ്ട്. നിരവധി പേര്‍ക്കാണ് ഹെലികോപ്ടര്‍ അപകടങ്ങളിൽ ജീവൻ നഷ്ടമാകുന്നത്. ഒരു നിമിഷം കൊണ്ട് എല്ലാം അവസാനിച്ചു എന്നാണ് കരുതിയത്. എന്നാൽ പൈലറ്റിന്റെ ശരിയായ ഇടപെടൽ കൊണ്ട് ജീവൻ തിരിച്ച് കിട്ടി. ദൈവത്തിന് നന്ദി. പാലാഷ് സെൻ തന്റെ ഫെയ്സ് ബുക്ക് പേജിൽ കുറിച്ചു. ഗായകനും ഗാന രചയിതാവും, സംഗീത സംവിധായകനുമായ പാലാഷ് സെൻ പോപ്പ് ബാൻഡ് ഉടമ കൂടിയാണ്.