കെഎസ്ആർടിസി ബസ് തകരാറിലായി; ദേശീയപാതയിൽ ഗതാഗതക്കുരുക്ക്

തുറവൂർ ∙ ചേർത്തലയിൽ നിന്നു നെടുമ്പാശേരിയിലേക്കു പോകുകയായിരുന്ന കെഎസ്ആർടിസി വോൾവോ ബസ് തകരാറിലായി ഗതാഗതം തടസ്സപ്പെട്ടു. ദേശീയപാതയിൽ അരൂർ തുറവൂർ ഉയരപ്പാത നിർമാണം നടക്കുന്ന അരൂർ പള്ളിക്ക് സമീപം ഇന്നലെ രാവിലെ 9നായിരുന്നു സംഭവം. ഒരുമണിക്കൂറോളം ഗതാഗതം ഭാഗികമായി തടസ്സപ്പെട്ടു.  ഗതാഗതക്കുരുക്കിനെ തുടർന്നു ചേർത്തലയിൽ നിന്നു എറണാകുളം ഭാഗത്തേക്ക് പോകുന്ന യാത്രക്കാർ ഏറെ ദുരിതത്തിലായി.  ഇരുചക്രവാഹനങ്ങൾക്കും ചെറുവാഹനങ്ങൾക്കും മാത്രമാണ് കടന്നുപോകാനായത്. ഉയരപ്പാത നിർമാണത്തിനായി കൊണ്ടുവന്ന ക്രെയിൻ ഉപയോഗിച്ച് ബസ് നീക്കം ചെയ്തതാണ് ഗതാഗതക്കുരുക്ക് ഒഴിവാക്കിയത്.