അങ്കണവാടിയും ക്വാർട്ടേഴ്സുകളും കാട്ടാനക്കൂട്ടം തകർത്തു

അങ്കമാലി ∙ കാലടി പ്ലാന്റേഷൻ കല്ലാല എസ്റ്റേറ്റ് ബി ഡിവിഷനിൽ അങ്കണവാടിയും തൊഴിലാളികളുടെ ക്വാർട്ടേഴ്സുകളും കാട്ടാനക്കൂട്ടം തകർത്തു. കെട്ടിടങ്ങളുടെ ഭിത്തിയും വാതിലുകളും തകർത്ത് കാട്ടാനകൾ ക്വാർട്ടേഴ്സുകളുടെ ഉള്ളിൽ കടന്നു. ക്വാർട്ടേഴ്സുകളിൽ രാത്രിയിൽ ആരും ഇല്ലാതിരുന്നതിനാൽ വൻ അപകടം ഒഴിവായി. ചൊവ്വാഴ്ച രാത്രിക്കും ഇന്നലെ പുലർച്ചെക്കും ഇടയിലായിരുന്നു കാട്ടാനക്കൂട്ടത്തിന്റെ ആക്രമണം. മുകളിലും താഴെയുമായി 2 നിരകളിലായി ഉണ്ടായിരുന്ന 8 ക്വാർട്ടേഴ്സുകളിൽ 4 എണ്ണം പൂർണമായി തകർത്തു. കാട്ടാന ശല്യത്തെ തുടർന്നു രാത്രിയിൽ ക്വാർട്ടേഴ്സുകളിൽ പലരും താമസിക്കാറില്ല.