സംസ്ഥാനത്തെ ഏറ്റവും മികച്ച ജില്ലയും വിദ്യാഭ്യാസ ജില്ലയും; നേട്ടത്തിന്റെ നെറുകയിൽ കോട്ടയവും പാലായും

കോട്ടയം ∙ ജില്ല നന്നായി പഠിച്ചു. സംസ്ഥാനത്ത് വിജയത്തിൽ ഒന്നാം സ്ഥാനം. വിദ്യാഭ്യാസ ഓഫിസുകൾ വഴി നടത്തിയ മുന്നൊരുക്കങ്ങളിലൂടെയാണു 99.92 ശതമാനം വിജയം നേടി കോട്ടയം സംസ്ഥാന തലത്തിൽ ഒന്നാമതെത്തിയത്. 18,828 പേർ പരീക്ഷ എഴുതിയതിൽ 18,813 വിദ്യാർഥികൾ ഉപരി പഠനത്തിന് അർഹരായി. പരീക്ഷ എഴുതിയതിൽ ഉപരിപഠനത്തിന് യോഗ്യത നേടാതെ പോയത് 15 പേർ മാത്രം. 100 ശതമാനം വിജയം നിലനിർത്തി സംസ്ഥാനത്ത് ഏറ്റവും കൂടുതൽ വിജയം നേടിയ വിദ്യാഭ്യാസ ജില്ലയായി പാലാ മാറിയതും ഇരട്ടി മധുരമായി. തുടർച്ചയായ നാലാം തവണയാണു പാലാ സംസ്ഥാനത്തെ ഏറ്റവും മികച്ച വിജയമുള്ള വിദ്യാഭ്യാസ ജില്ലയാകുന്നത്.