മധ്യവയസ്കയെ ആക്രമിച്ച കേസിൽ പിതാവും മകനും അറസ്റ്റിൽ

കറുകച്ചാൽ ∙ മധ്യവയസ്കയെ ആക്രമിച്ച കേസിൽ അച്ഛനും മകനും അറസ്റ്റിൽ. നെടുംകുന്നം നിലംപൊടിഞ്ഞ ഇടക്കല്ലിൽ വീട്ടിൽ കെ.ആർ.സുകുമാരൻ നായർ ( 61 ), മകൻ ഇ.എസ്.സുജിത്ത് കുമാർ ( 34 ) എന്നിവരെയാണ് കറുകച്ചാൽ പൊലീസ് അറസ്റ്റ് ചെയ്തത്. ഇരുവരെയും കോടതിയിൽ ഹാജരാക്കി.

ഇരുവരും ചേർന്ന് കഴിഞ്ഞ ദിവസം ഉച്ചയ്ക്ക് 2 മണിയോടെ നെടുംകുന്നം നിലപൊടിഞ്ഞ കവല ഭാഗത്ത് വച്ച് നെടുംകുന്നം വട്ടക്കാവ് സ്വദേശിനിയായ മധ്യവയസ്കയെ ചീത്ത വിളിക്കുകയും ദേഹോപദ്രവം ഏൽപ്പിക്കുകയുമായിരുന്നു. വീട്ടമ്മയുടെ മകനുമായി ഇവർക്ക് മുൻവൈരാഗ്യം നിലനിന്നിരുന്നു. കറുകച്ചാൽ സ്റ്റേഷൻ എസ്ഐ ജി.സുനിൽ, സിപിഒമാരായ സന്തോഷ് കുമാർ, സുരേഷ്, സുനോജ് എന്നിവരാണ് പ്രതികളെ അറസ്റ്റ് ചെയ്തത്.