നേരിട്ടത് പത്തോളം ശസ്ത്രക്രിയകൾ; കനൽവഴികൾ താണ്ടിയ മെബിന് മികച്ച വിജയം

കോലഞ്ചേരി ∙ പേന പിടിക്കാൻ ശസ്ത്രക്രിയയിലൂടെ നേരെയാക്കിയ കൈവിരലുകൾ. ചെരിപ്പിടാൻ രൂപപ്പെടുത്തിയ കാൽ വിരലുകൾ. തല തുറന്ന് 2 ശസ്ത്രക്രിയകൾ. കണ്ണും മുഖവും പല്ലുകളും നേരെയാക്കാൻ മറ്റു ശസ്ത്രക്രിയകൾ. ഒന്നാം ക്ലാസ് മുതൽ ഇതുവരെ പത്തോളം ശസ്ത്രക്രിയകൾക്കു വിധേയനായ മെബിൻ മോബിയുടെ മുഖത്ത് എസ്എസ്എൽസി ഫലം അറിഞ്ഞപ്പോൾ വിരിഞ്ഞത് അതിജീവനത്തിന്റെ പുഞ്ചിരി.ഒരു വിഷയത്തിന് എ പ്ലസും 3 എണ്ണത്തിന് എ ഗ്രേഡും ഉൾപ്പെടെ മികച്ച വിജയമാണ് പരിമിതി മറികടന്ന് ഈ മിടുക്കൻ നേടിയെടുത്തത്.
കടയിരുപ്പ് ഗവ. എൽപി സ്കൂളിലേക്കു മാതാപിതാക്കൾ എടുത്തു കൊണ്ടുപോയിരുന്ന കുട്ടിയല്ല ഇന്നു മെബിൻ. ഓരോ ശസ്ത്രക്രിയയും നൽകുന്ന കരുത്തിൽ പ്രതിസന്ധികളെ അതിജീവിച്ചു. സൈക്കിളിലാണ് ഇപ്പോൾ യാത്ര.