ആമിർ ഖാനെ ടൂറിസം മന്ത്രാലയം 'ഇൻക്രെഡിബിൾ' ഇന്ത്യയുടെ ബ്രാൻഡ് അംബാസിഡർ പദവിയിൽ നിന്നും പുറത്താക്കി. അസഹിഷ്ണുത വിവാദത്തിൽ ആമിറിനെതിരെ നടക്കുന്ന പ്രതിഷേധങ്ങളെത്തുടർന്നാണ് ടൂറിസം മന്ത്രാലയം ഇങ്ങനെയൊരു തീരുമാനമെടുത്തതെന്നാണ് റിപ്പോർട്ട്.
വർഷങ്ങളായി ആമിർ തന്നെയായിരുന്നു ഈ പദ്ധതിയുടെ അംബാസിഡർ. മാത്രമല്ല ഗവൺമെന്റിന്റെ തന്നെ നിരവധി പരസ്യ ചിത്രങ്ങളിലും അദ്ദേഹം അഭിനയിച്ചിരുന്നു. എന്നാൽ ആമിറിനെതിരെയുള്ള പ്രതിഷേധം കടുത്തതോടെയാണ് ഈ നിലപാടിലേക്ക് സർക്കാർ മാറിയത്.
രാജ്യത്ത് അസഹിഷ്ണുത നിലനിൽക്കുന്നുവെന്ന പ്രസ്താവന വിവാദമായതോടെ ആമിറിനെതിരെ ബിജെപി ഉൾപ്പടെയുള്ള രാഷ്ട്രീയ പാർട്ടികൾ രംഗത്തെത്തിയിരുന്നു. എട്ടാമത് രാമനാഥ് ഗോയങ്കെ അവാർഡ്ദാന ചടങ്ങിനിടെയായിരുന്നു അസഹിഷ്ണുതയ്ക്കെതിരെ ആമിറിന്റെ പ്രതികരണം.രാജ്യത്ത് കുറച്ചു നാളായി അരക്ഷിതാവസ്ഥ അനുഭവപ്പെടുന്നു. ഇതിനെതിരെ ഉത്തരവാദിത്തപ്പെട്ടവർ നടപടിയെടുക്കാൻ തയാറാകുന്നില്ലെന്നും ആമിർ പറഞ്ഞു.
ഒരാൾ കുറ്റകൃത്യം ചെയ്യുമ്പോൾ അയാളെ മുസ്‍ലിം ഭീകരനെന്നോ ഹിന്ദു ഭീകരനെന്നോ മുദ്രകുത്തി ആദ്യത്തെ തെറ്റ് നമ്മൾ ചെയ്യുന്നു. ഭീകരവാദത്തെ ഏതെങ്കിലും മതവുമായി ബന്ധപ്പെടുത്തുന്നത് ശരിയല്ല. മുസ്‍ലിം കുടുംബത്തിൽ പിറന്ന തനിക്ക് ഐഎസ് എന്ന പേരിൽ ഭീകരവാദം നടത്തുന്നവരെ ഇസ്‍ലാം മതത്തിൽപ്പെട്ടവരായി കാണാനാകില്ല.<
പുരസ്കാരങ്ങൾ മടക്കി നൽകിയുള്ള പ്രതിഷേധത്തെ പിന്തുണയ്ക്കുന്നു. എല്ലാ വ്യക്തികൾക്കും പ്രതിഷേധിക്കാനുള്ള അവകാശമുണ്ട്. ശരിയെന്നു തോന്നുന്ന ഏതു രീതിയിലും അവർക്ക് പ്രതിഷേധിക്കാം. പക്ഷേ അതൊരിക്കലും നിയമത്തെ കയ്യിലെടുത്താകരുതെന്നും ആമിർ കൂട്ടിച്ചേർത്തു.