അങ്കമാലി ഡയറീസിനും ആട് 2വിന് ശേഷം 2018ലെ ആദ്യ പ്രോജക്ടുമായി ഫ്രൈഡേ ഫിലിംസ്. ജൂണ് എന്നുപേരിട്ടിരിക്കുന്ന ചിത്രത്തിന്റെ ഫസ്റ്റ്ലുക്ക് പോസ്റ്റർ അണിയറപ്രവർത്തകർ പുറത്തിറക്കി. സിനിമയുടെ ഷൂട്ടിങ് ജൂലൈ 11 മുതല് ആരംഭിക്കും. അങ്കമാലി ഡയറീസ് പോലെ തന്നെ പുതിയ സിനിമയിലും പരിചയമുള്ള താരങ്ങള്ക്കൊപ്പം മുഖ്യ കഥാപാത്രങ്ങളെ അവതരിപ്പിക്കുന്നത് പുതുമുഖങ്ങളായിരിക്കുമെന്നാണ് നിര്മാതാവ് വിജയ് ബാബു പറയുന്നത്.
വിജയ് ബാബുവിന്റെ കുറിപ്പ്–
ഇക്കാലമത്രയും മികച്ച ഒരുപിടി ടെക്നീഷ്യൻസ് ഉൾപ്പെടെ നൂറിൽപ്പരം പുതുമുഖങ്ങൾക്ക് അവരുടെ ആദ്യ അവസരം നൽകിയ ഫ്രൈഡേ ഫിലിം ഹൗസ് ഞങ്ങളുടെ പത്താമത്തെ പ്രോജക്ടിന്റെ ഫസ്റ്റ് ലുക്ക് പോസ്റ്റർ ഏറെ അഭിമാനത്തോടെ നിങ്ങൾക്കു മുമ്പിൽ അവതരിപ്പിക്കുകയാണ്.
‘ജൂൺ' എന്ന് പേരിട്ടിരിക്കുന്ന ഈ ചിത്രത്തിലും പരിചിതമായ നിങ്ങളുടെ പ്രിയതാരങ്ങളോടൊപ്പം, ഒരുപിടി പ്രതിഭാധനരായ പുതുമുഖങ്ങളെക്കൂടി മലയാളസിനിമയ്ക്ക് ഞങ്ങൾ സംഭാവന ചെയ്യുകയാണ്. സമാന്തരമായി പതിനൊന്നാമത്തെ പ്രോജക്ട് ഉടനെതന്നെ ആരംഭിക്കുന്നതും തുടർന്ന് നിങ്ങൾക്ക് അറിവുള്ളതുപോലെ കോട്ടയം കുഞ്ഞച്ചൻ 2, ആട് 3 എന്നീ പ്രോജക്ടുകളും ഉണ്ടായിരിക്കുന്നതാണ്.
ഏറെ സർപ്രൈസുകളുളള 'ജൂൺ' ജൂലൈ 11 മുതൽ ഷൂട്ടിംഗ് ആരംഭിക്കുകയാണ്. എക്കാലത്തേയും പോലെ ഏവരുടെയും സ്നേഹസഹകരണങ്ങളും, പ്രാർത്ഥനകളും ഞങ്ങൾക്കൊപ്പമുണ്ടാകണമെന്ന് ആഗ്രഹിക്കുന്നു.
ആട് 2 വിന് ശേഷം രണ്ട് വലിയ പ്രോജക്ടുകളായിരുന്നു ഫ്രൈഡേ ഫിലിം ഹൗസ് അനൗണ്സ് ചെയ്തിരുന്നത്. മമ്മൂട്ടിയെ നായകനാക്കി കോട്ടയം കുഞ്ഞച്ചന്റെ രണ്ടാം ഭാഗം വരികയാണ്. മിഥുന് മാനുവല് തോമസ് സംവിധാനം ചെയ്യുന്ന ചിത്രത്തിന് കോട്ടയം കുഞ്ഞച്ചന് 2 എന്നാണ് പേരിട്ടിരിക്കുന്നത്. അതിന് ശേഷമായിരിക്കും ജയസൂര്യയുടെ ആട് 3 വരുന്നത്. ആടിന്റെ മൂന്നാം ഭാഗം ത്രിഡിയിലാണ് നിര്മ്മിക്കുന്നതെന്ന പ്രത്യേകതയുമുണ്ട്.