ദുബായ്∙ ദുബായ് നഗരത്തിനു സമീപമുള്ള മർമൂം അൽ ലിസൈലിയിൽ ഇന്നലെ രാത്രി ഒൻപതിനുണ്ടായ വാഹനാപകടത്തിൽ രണ്ടു മലയാളികൾ മരിച്ചു. മലപ്പുറം വളവന്നൂർ സ്വദേശി അബ്ദുൽ മജീദ്‌ പൊട്ടച്ചോല (41), വളാഞ്ചേരി സ്വദേശി ഷംസുദ്ദീൻ പാലക്കൽ (42) എന്നിവരാണു മരിച്ചത്. അൽ ലിസൈലിയിലെ ഒരു കുതിര വളർത്തു കേന്ദ്രത്തിലെ ജീവനക്കാരായ ഇരുവരും ജോലി കഴിഞ്ഞു രാത്രി നടക്കാനിറങ്ങിയപ്പോൾ അമിത വേഗത്തിലെത്തിയ വാഹനം ഇടിക്കുകയായിരുന്നു. ഇടിയുടെ ആഘാതത്തിൽ മീറ്ററുകളോളം തെറിച്ചുവീണ ഇരുവരും സംഭവ സ്ഥലത്തു തന്നെ മരിച്ചു. മൃതദേഹങ്ങൾ മോർച്ചറിയിലേക്കു മാറ്റി.