കോഴിക്കോട് നടക്കുന്ന ദേശീയ സീനിയർ വോളിബോൾ ചാംപ്യൻഷിപ്പിന്റെ സെമിയിൽ തമിഴ്നാടിനെതിരെ കേരളത്തിന്റെ സി. അജിത്ത് ലാലിന്റെ സ്മാഷ്. ചിത്രം: റസൽ ഷാഹുൽ
കോഴിക്കോട്∙ ദേശീയ സീനിയർ വോളിബോൾ ചാംപ്യൻഷിപ്പിൽ തമിഴ്നാടിനെ തോൽപിച്ച് കേരളത്തിന്റെ പുരുഷ ടീമും ഫൈനലിൽ. നേരിട്ടുള്ള സെറ്റുകൾക്കാണ് കേരളത്തിന്റെ വിജയം. കടുത്ത മൽസരത്തിലൂടെയാണ് കേരളം മൂന്നുസെറ്റുകളും നേടിയത്. സ്കോർ: 25– 22, 30–28, 25–22. ക്യാപ്റ്റൻ ജെറോം വിനീതിന്റെയും അജിത് ലാലിന്റെയും തകർപ്പൻ പ്രകടനമാണ് സെമിയിൽ തമിഴ്നാടിനെ മറികടക്കാൻ കേരളത്തിന് തുണയായത്. ബുധനാഴ്ച വൈകിട്ട് അഞ്ചിന് നടക്കുന്ന ഫൈനലിൽ റെയിൽവേയാണ് കേരളത്തിന്റെ എതിരാളികൾ.
കോഴിക്കോട്ട് ദേശീയ സീനിയർ വോളിബോൾ ചാംപ്യൻഷിപ്പിന്റെ സെമിഫൈനലിൽ തമിഴ്നാടിനെ തോൽപ്പിച്ച കേരള താരങ്ങൾ കാണികളുടെ പിന്തുണയ്ക്ക് നന്ദി അറിയിക്കുന്നു. ചിത്രം: റസൽ ഷാഹുൽമഹാരാഷ്ട്രയെ തോൽപിച്ച് റെയിൽവേ ഫൈനലിൽ കടന്നതോടെ വനിതാ വിഭാഗത്തിലും കേരളം–റെയിൽവേ ഫൈനലിന് അരങ്ങൊരുങ്ങി. നേരിട്ടുള്ള സെറ്റുകൾക്കാണ് മഹാരാഷ്ട്രയ്ക്കെതിരെ റെയിൽവേയുടെ വിജയം. സ്കോർ: 25–08, 25–14, 25–18. ബുധനാഴ്ച പുരുഷവിഭാഗം ഫൈനലിനു മുന്നോടിയായി മൂന്നു മണിക്കാണ് വനിതാ വിഭാഗം ഫൈനൽ. ഇന്നലെ നടന്ന സെമിയിൽ തമിഴ്നാടിനെ നേരിട്ടുള്ള സെറ്റുകൾക്ക് തോൽപ്പിച്ചാണ് കേരള വനിതകൾ ഫൈനലിൽ കടന്നത്.
