തിരുവനന്തപുരം∙മുഖ്യമന്ത്രി പിണറായി വിജയൻ ചികിത്സയ്ക്കായി അമേരിക്കയിലേക്കു പോയ സാഹചര്യത്തിൽ മന്ത്രിസഭാ യോഗത്തിൽ അധ്യക്ഷ്യം വഹിക്കുന്നതിനു മന്ത്രി ഇ.പി.ജയരാജനു ഗവർണർ പി.സദാശിവം അനുമതി നൽകി.അതേസമയം, മുഖ്യമന്ത്രി കൈകാര്യം ചെയ്യുന്ന വകുപ്പുകൾ മറ്റാർക്കും കൈമാറിയിട്ടില്ല.
തന്റെ അസാന്നിധ്യത്തിൽ ജയരാജനു മന്ത്രിസഭയിൽ ആധ്യക്ഷ്യം വഹിക്കാൻ അനുമതി നൽകണമെന്ന് ആവശ്യപ്പെട്ടു മുഖ്യമന്ത്രി ഗവർണർക്കു കത്തു നൽകിയിരുന്നു.ഇതേ തുടർന്നാണ് അനുമതി നൽകിയതായി ഗവർണർ മുഖ്യമന്ത്രിയുടെ ഓഫിസിനെ രേഖാമൂലം അറിയിച്ചത്.