ഭാര്യമാർക്കു വേണ്ടി എന്തൊക്കെ വാങ്ങിയാലും മതിയാവില്ല ചില ഭർത്താക്കന്മാർക്ക്. പൂമുഖ വാതിൽക്കൽ സ്നേഹം തുളുമ്പുന്ന മുഖം കാണാന്‍ ഒരു ഷോപിങ് മാമാങ്കം തന്നെ ന‌ടത്താനും ചില ഭര്‍ത്താക്കന്മാർ തയ്യാറാണ്. ഇത്തരത്തിൽ പ്രിയപത്നിയ്ക്കു വേണ്ടി ഒരു മന്ത്രി ഭർത്താവ് വാങ്ങിക്കൊടുത്തത് എന്താണെന്നറിയാമോ? 1.08ലക്ഷം വിലയുള്ള സാരി. വെറും സാരിയല്ല നല്ല അസൽ വാട്ടര്‍പ്രൂഫ് സാരി. അതായത് വെള്ളം തട്ടിയാലും സംഗതി നനയുകയേയില്ല. കർണാടക മുഖ്യമന്ത്രി സിദ്ധരാമയ്യയാണ് ഭാര്യ പാർവതിയ്ക്കു വേണ്ടി വ്യത്യസ്തമാർന്നൊരു സമ്മാനം നൽകിയത്.
ദാവങ്കിരിയിലെ കർണാടക സിൽക് ഇൻഡസ്ട്രീസ് കോർപറേഷന്റെ ഉദ്ഘാടനത്തിനു ശേഷമാണ് മുഖ്യമന്ത്രി സ്പെഷ്യൽ സാരി സ്വന്തമാക്കിയത്. സ്വർണ്ണ നൂലുകളാൽ കൊരുത്തെടുത്ത സാരി സ്ഥലത്തുവച്ചു തന്നെ വെള്ളത്തിൽ മുക്കി വാട്ടർപ്രൂഫ് ആണെന്ന് ഉറപ്പു വരുത്തിയതിനു ശേഷം മാത്രമാണ് മന്ത്രി വാങ്ങിയത്.