കൊച്ചി∙ മാർക്കറ്റിങ്ങിൽ വിവരങ്ങൾ ഏറ്റവും പ്രധാനപ്പെട്ടതാണെങ്കിലും വിവരങ്ങളുടെ അതിഭാരമാണ് ഇന്ന് നേരിടുന്ന ഏറ്റവും വലിയ വെല്ലുവിളികളിലൊന്നെന്ന് രാഹുൽ വെങ്ങാലിൽ. അധിക വിവരങ്ങൾകൊണ്ട് അവയെ ഉപയോഗിക്കാനാവാത്ത അവസ്ഥ ഒഴിവാക്കപ്പെടേണ്ടതാണ്. കൺമുൻപിലുള്ളതിനേക്കാൾ കാണാനാവാത്ത വെല്ലുവിളികളാണ് ഏതൊരു ബിസിനസിനും മുന്നിലുള്ളത്. പ്രത്യേകിച്ചും ടെക്നോളജി ബിസിനസുകളിൽ. നിക്ഷേപങ്ങളെ ഫലപ്രദമായി ഉപയോഗിക്കുന്നതും അനിശ്ചിതത്വങ്ങളെ കാണാനുള്ള കഴിവും വിവരങ്ങളെ കൈകാര്യം ചെയ്യുന്ന രീതിയുമെല്ലാമാണ് ഒരു ബിസിനസിനെ വിജയത്തിലേയ്ക്ക് നയിക്കുന്നതെന്നും രാഹുൽ പറയുന്നു.
ഒരു ടെക്നോളജി ടാബ്ലോയ്ഡ് തുടങ്ങി ബിസിനസിൽ ചുവടുവെച്ച കോഴിക്കോടുകാരൻ രാഹുൽ തന്റെ ഇന്നത്തെ പ്ലാറ്റ്ഫോമിലേയ്ക്ക് എത്തും മുമ്പ് വ്യത്യസ്ഥ മേഖലകളിലുള്ള ഏതാനും പ്രധാന സ്ഥാപനങ്ങളുമായി ചേർന്ന് പ്രവർത്തിച്ചതിന്റെ പരിചയമാണ് കൈമുതലായുള്ളത്. ഇതിൽ നിന്നെല്ലാം ലഭിച്ച പാഠങ്ങൾ ചേർത്തുവച്ചാണ് തന്റെ ബിസിനസ് സ്ഥാപനം വാട്ട് ക്ലിക് സ്ഥാപിച്ചതെന്ന് അദ്ദേഹം പറയുന്നു.
