വീട്ടമ്മമാരെ കുഴയ്ക്കുന്ന പ്രശ്നമാണ് പ്രഭാതഭക്ഷണം. എന്നും പുട്ടും കടലയും ദോശയുമൊക്കെയാണോ? എന്നു ചോദിച്ചു വഴക്കിടുന്ന കുട്ടിപ്പട്ടാളത്തിന് ആഴ്ചയിലൊരിക്കൽ സാൻവിച്ച് സർപ്രൈസ് നൽകിയാലോ? ചിക്കൻ ടെറിയാക്കി നിറച്ചൊരു സാൻവിച്ച് കൂട്ട് പരിചയപ്പെടാം.
സബ്മെറൈൻ സാൻവിച്ച് ചേരുവകൾ
ചിക്കൻ ടെറിയാക്കിക്ക്
1. ചിക്കൻ എല്ലില്ലാതെ — 200 ഗ്രാം
2. കോൺഫ്ലവർ — ഒന്നര വലിയ സ്പൂൺ
3. ഒലിവ് ഓയിൽ — രണ്ടു വലിയ സ്പൂൺ
4. ചില്ലി ഗാർലിക് സോസ് — കാൽകപ്പ്
സോയാസോസ് — ഒന്നര വലിയ സ്പൂൺ
വിനാഗിരി — ഒരു ചെറിയ സ്പൂൺ
ഇഞ്ചി ഗ്രേറ്റ് ചെയ്തത് — ഒരു ചെറിയ സ്പൂൺ
ഉപ്പ് — പാകത്തിന്
സാൻവിച്ചിന്
5. റൊട്ടി (ഫുട്ട്ലോങ് — ഹോട്ട്ഡോഗിനും മറ്റും ഉപയോഗിക്കുന്ന പ്രത്യേകതരം റൊട്ടി ലോഫ്)— നാല്
6. മയണീസ് — നാലു വലിയ സ്പൂൺ
7. ലെറ്റൂസ് അരിഞ്ഞത് — 20 ഗ്രാം
സാലഡ് വെള്ളരി കനം കുറച്ചരിഞ്ഞത് — 50 ഗ്രാം
കാപ്സിക്കം കനം കുറച്ചരിഞ്ഞത് — 50 ഗ്രാം
8. കുരുമുളകുപൊടി — ഒരു ചെറിയ സ്പൂൺ
പാകം ചെയ്യുന്ന വിധം
∙ ചിക്കൻ കഴുകി വെള്ളം ഊറ്റാൻ വയ്ക്കുക.
∙ വെള്ളം വാർന്നശേഷം കനംകുറച്ചു നീളത്തിൽ അരിയുക.
∙ ഇതിൽ കോൺഫ്ളവർ വിതറി, നന്നായി യോജിപ്പിക്കുക.
∙ പാനിൽ എണ്ണ ചൂടാക്കി ചിക്കൻ ചേർത്ത് ഇളംബ്രൗൺ നിറമാകും വരെ വഴറ്റുക.
∙ നാലാമത്തെ ചേരുവ യോജിപ്പിച്ചത്, ചിക്കനിൽ ചേർത്തു നന്നായി വഴറ്റി, സോസ് മുഴുവൻ ചിക്കനിൽ പുരണ്ട്, വരണ്ട പരുവത്തിൽ, വാങ്ങുക. ഇതാണ് ചിക്കൻ ടെറിയാക്കി.
∙ റൊട്ടി(ഫുട്ട്ലോങ്) നീളത്തിൽ മുറിക്കുക. താഴത്തെ പീസിൽ മയണീസ് പുരട്ടി, എഴാമത്തെ ചേരുവ നിരത്തുക.
∙ ഇതിനു മുകളിൽ കുരുമുളകുപൊടി വിതറിയശേഷം തയാറാക്കിയ ചിക്കൻ ടെറിയാക്കി നിരത്തുക.
∙ ഇതു മുകൾഭാഗത്തെ റൊട്ടിക്കഷണം കൊണ്ടു മൂടി കഴിക്കാം. വേണമെങ്കിൽ മൂന്നു മിനിറ്റ് ഗ്രിൽ ചെയ്തശേഷം വിളമ്പാം.
