ഇരിട്ടി മേഖലയിൽ നിന്ന് 4 രാജവെമ്പാലകളെ പിടികൂടി
Mail This Article
ഇരിട്ടി∙ ആറളം ഫാം പുനരധിവാസ മേഖല, അയ്യൻകുന്ന് പഞ്ചായത്തിലെ പാലത്തിൻകടവ് എന്നിവിടങ്ങളിൽ നിന്നായി പിടികൂടിയത് 4 രാജവെമ്പാലകളെ. മാർക്ക് പ്രവർത്തകനും വനം താൽക്കാലിക വാച്ചറുമായ ഫൈസൽ വിളിക്കോടിന്റെ നേതൃത്വത്തിലാണ് പാമ്പുകളെ പിടികൂടിയത്. ഇവയെ പിന്നീട് ഉൾവനത്തിൽ വിട്ടു.
പുനരധിവാസ മേഖലയിലെ ബ്ലോക്ക് 13 ൽ രാവിലെയും ഉച്ചയ്ക്കും വൈകിട്ടുമായി വീടുകൾക്ക് സമീപം തോടുള്ള ഭാഗത്താണു രാജവെമ്പാലകളെ കണ്ടെത്തിയത്. പ്രദേശവാസികൾ വിവരം അറിയിച്ചതനുസരിച്ച് 3 സമയത്തും ഫൈസലും സംഘവും എത്തുകയായിരുന്നു. പാലത്തിൻകടവിലെ കുളത്തിങ്കര ജോൺസന്റെ വീടിന്റെ സമീപത്താണ് രാജവെമ്പാല ഉണ്ടായിരുന്നത്. ഫൈസൽ വിളക്കോട് വനം വകുപ്പിൽ താൽക്കാലിക വാച്ചറായി എത്തി ഈ മേഖലയിൽ സേവനം തുടങ്ങിയ ശേഷം പിടിയിലാകുന്ന 44 –ാമത്തെ രാജവെമ്പാലയാണ് പാലത്തിൻകടവിൽ നിന്നുള്ളത്.