വേനൽമഴ ‘കടുത്തു’; കാറ്റിലും മിന്നലിലും മലയോരത്ത് വ്യപകനാശം

ചെറുപുഴ∙ വേനൽമഴക്കൊപ്പം ഉണ്ടായ ശക്തമായ കാറ്റിലും ഇടിമിന്നലിലും മലയോരത്ത് വ്യാപക നാശം. ചെറുപുഴ പഞ്ചായത്തിലെ രാജഗിരി, മുക്കുഴി, മരുതുംതട്ട്, ചാത്തമംഗലം ഭാഗങ്ങളിലാണു നാശമുണ്ടായത്. മുക്കുഴിയിൽ മിന്നലേറ്റു പൂവത്ത് നിർമലയുടെ കറവപ്പശു ചത്തു. ഇതിനുപുറമെ വീടിന്റെ വയറിങ് പൂർണമായും കത്തിനശിക്കുകയും ചെയ്തു. മരുതുംതട്ടിലെ ഇല്ലിക്കുന്നേൽ ജിൻസന്റെ വീടിനുമുകളിൽ മരം ഒടിഞ്ഞുവീണതിനെ തുടർന്നു മേൽക്കൂര തകരുകയും വീട്ടുപകരണങ്ങൾ നശിക്കുകയും ചെയ്തു. രാജഗിരി തോട് ചെളിവെള്ളം കുത്തിയൊഴുകി വെള്ളം മലിനമായി. തോട്ടിൽ പൈപ്പിട്ടാണു പരിസരവാസികൾ വെള്ളം ശേഖരിക്കുന്നത്.