രണ്ടാൾ പൊക്കത്തിൽ ഷാജി പാപ്പൻ, കീലേരി അച്ചു; തിരൂരിലുമെത്തി ആകെയൊന്നു വിലസി

തിരൂർ ∙ ഷാജി പാപ്പനും കീലേരി അച്ചുവും ദശമൂലം ദാമുവും രമണനും കാട്ടുപറമ്പൻ ചേട്ടനുമെല്ലാം തിരൂരിലുമെത്തി ആകെയൊന്നു വിലസി. രണ്ടാൾ പൊക്കമുള്ള ഈ ട്രോളുകളിലെ സൂപ്പർ താരങ്ങൾ ‘കോട്ട് ഫെസ്റ്റി’ന്റെ ഭാഗമായി നടന്ന ഘോഷയാത്രയിൽ പങ്കെടുക്കാനാണ് നഗരത്തിൽ എത്തിയത്.

സമൂഹ മാധ്യമങ്ങളിൽ തരംഗം സൃഷ്ടിച്ച ഈ രൂപങ്ങളെല്ലാം ഗുരുവായൂരിലെ സൗപർണിക കലാലയമാണ് അണിയിച്ചൊരുക്കുന്നത്. 23 കിലോഗ്രാമോളം ഭാരമുണ്ട് ഓരോ വേഷത്തിനും. 4 – 5 മണിക്കൂർ വരെ ഇങ്ങനെ വേഷമിട്ട് നടക്കേണ്ടി വരാറുണ്ട്. സൗപർണിക കലാലയത്തിലെ രഞ്ജിത്ത്, ഭാസ്കരൻ, ചന്ദ്രൻ, രാജീവ്, ബൈജു എന്നിവരാണ് വേഷമിട്ടെത്തുന്നത്. സൗപർണികയിലെ രാജേഷും വിനീതുമാണ് മേൽനോട്ടം.