വീടിനുള്ളിൽ അഴുകിയ നിലയിൽ മൃതദേഹം, മുഖത്തും കഴുത്തിനും പരുക്കുകൾ ; കൊലപാതകമെന്ന് സംശയം

വേലൂർ ∙ കുറുമാൽ മിച്ചഭൂമിയിൽ വീടിനുള്ളിൽ അഴുകിയ നിലയിൽ മൃതദേഹം കണ്ടെത്തിയ സംഭവം കൊലപാതകമെന്ന സംശയം ബലപ്പെടുന്നു. ഇൗ സാധ്യതയെ പിന്തുടർന്നാണ് പൊലീസ് അന്വേഷണം പുരോഗമിക്കുന്നത്. ഒറ്റയ്ക്ക് താമസിക്കുന്ന കുരിശിങ്കൽ ഡെന്നി (45)യുടേതെന്നു സംശയിക്കുന്ന 5 ദിവസം പഴക്കമുള്ള മൃതദേഹമാണ് തിങ്കൾ വൈകിട്ടോടെ കണ്ടെത്തിയത്. 

ഫൊറൻസിക് വിഭാഗത്തിന്റെ പ്രാഥമിക പരിശോധനയിൽ ഡെന്നിയുടെ മുഖത്തും കഴുത്തിനും പരുക്കുകളുണ്ടന്ന് കണ്ടെത്തിയിട്ടുണ്ട്. മൃതദേഹം കിടന്നിരുന്ന വീടിന്റെ പിറകുവശത്തുനിന്ന് രക്തം പുരണ്ട നിലയിൽ വടിയും കണ്ടെടുത്തിട്ടുണ്ട്. ഡെന്നി 5 വർഷമായി ഇവിടെ ഒറ്റയ്ക്കാണു തമാസിക്കുന്നത്. പോസ്റ്റ്മോര്‍ട്ടം റിപ്പോര്‍ട്ട് ലഭിക്കുന്നതോടെ കൂടുതല്‍ കാര്യങ്ങള്‍ വ്യക്തമാകുമെന്ന് പൊലീസ് പറഞ്ഞു.