സംസ്ഥാനപാത പൈപ്പ് പൊട്ടി തകർന്നു! ഒന്നര മാസമായിട്ടും റീ ടാർ ചെയ്തില്ല

പെരുമ്പിലാവ് ∙ സംസ്ഥാനപാതയിൽ പെരുമ്പിലാവ് പട്ടാമ്പി റോഡ് കുടിവെള്ള പൈപ്പ് പൊട്ടി പൊളിഞ്ഞത് ഒന്നര മാസം പിന്നിട്ടിട്ടും റീടാർ ചെയ്തില്ല. ഇതുമൂലം ഗതാഗത തടസ്സം രൂക്ഷമാണ്. റോഡിന്റെ വീതി കുറവും തെരുവു വിളക്കുകളുടെ കുറവും രാത്രി വാഹനങ്ങൾക്ക് അപകട ഭീഷണിയാവുന്നു. നാലര കോടി രൂപ ചെലവിട്ടു പുതുതായി നിർമിച്ച റോഡാണു ജലഅതോറിറ്റിയുടെ പ്രധാന പൈപ്പ് പൊട്ടി കഴിഞ്ഞ മാർച്ച് 25നു തകർന്നത്.  റോഡിൽ ഒരടിയോളം താഴ്ചയുള്ള വലിയ കുഴി രൂപം കൊള്ളുകയും 15 മീറ്ററോളം നീളത്തിൽ നടുഭാഗത്തു വിള്ളൽ ഉണ്ടാകുകയും ചെയ്തിരുന്നു. ദിവസങ്ങൾക്കകം പൈപ്പ് മാറ്റുകയും ഗർത്തങ്ങൾ മൂടുകയും ചെയ്തെങ്കിലും റോഡ് ടാർ ചെയ്തില്ല. ജലഅതോറിറ്റിക്കാണ് ഇതിന്റെ ചുമതലയെന്നു മരാമത്ത് അധികൃതർ പറയുന്നു.