സിബിഎസ്ഇ 11, 12: കോംപിറ്റൻസി ചോദ്യങ്ങൾ കൂട്ടും

ന്യൂഡൽഹി : പുതിയ അധ്യയന വർഷത്തെ സിബിഎസ്ഇ 11, 12 ക്ലാസ് വാർഷിക ബോർഡ് പരീക്ഷകളിൽ കോംപിറ്റൻസി അധിഷ്ഠിത ചോദ്യങ്ങൾ കൂട്ടുന്നു. പാഠവിഷയങ്ങൾ വിദ്യാർഥികൾ എത്രത്തോളം മനസ്സിലാക്കിയെന്നു വിലയിരുത്താനുള്ള കോംപിറ്റൻസി അധിഷ്ഠിത മൾട്ടിപ്പിൾ ചോയ്സ് ചോദ്യങ്ങൾ, കേസ് ബേസ്ഡ് ചോദ്യങ്ങൾ എന്നിവ നിലവിൽ 40 ശതമാനമാണ്. ഇതാണ് 50 ശതമാനമാക്കുന്നത്.

കഴിഞ്ഞ അധ്യയനവർഷമാണ് ഇവ 30 ശതമാനത്തിൽ നിന്നു 40 ആക്കിയത്. ഹ്രസ്വ, വിശദ ഉത്തരങ്ങൾ നൽകാനുള്ള ചോദ്യങ്ങൾ നിലവിലെ 40ൽ നിന്നു ‌30 ശതമാനമായി കുറച്ചു. ബാക്കിയുള്ള മൾട്ടിപ്പിൾ ചോയ്സ് ചോദ്യങ്ങൾ 20 ശതമാനമായി തന്നെ തുടരും. സിബിഎസ്ഇയുടെ 9,10 ക്ലാസുകളിൽ ഈ മാറ്റങ്ങൾ കഴിഞ്ഞ വർഷം വരുത്തിയിരുന്നു.