പ്രണയ ഭാഷ – സനീഷ് രാമപുരം എഴുതിയ കവിത

പ്രിയ സഖീ അറിയുമോ എൻ മൗനം 

നിന്നോടിനിയും മൊഴിയാത്തൊരെൻ ഭാഷയെന്ന് 

പ്രണയമൊരാഴിയായുള്ളിലുണ്ടെങ്കിലും 

ചെറു തിരപോലും നിൻ നേർക്കൊഴുകിയില്ല 
 

പ്രിയസഖീ അറിയുന്നു ഞാനും, ഇന്നാ - 

തിരയെ കൊതിക്കുന്ന പെൺകൊടി നീ. 

അറിയുമോ നിനക്കെന്റെ ഉള്ളം, മതിവരാ-

കേവലം തിരയായലിഞ്ഞു ചേരാൻ 
 

പ്രളയമായ് ഒന്നായൊഴുകിയെത്തിക്കുവാൻ 

മതിയില്ല ഞാൻ പെറ്റ ഭാഷയൊന്നും 

മുഴുവനായൊഴുകുവാനറിയാത്ത ഭാഷയെൻ 

മനതാരിൽ മൗനമായ്, ആഴിയായ് തിങ്ങി നിൽപ്പൂ 
 

പറയുവാനറിയാത്ത ഭാഷയ്‌ക്കതീതമാം 

ഹൃദയപ്പിടപ്പാണെൻ പ്രണയം.

നെഞ്ചോടു ചേർത്തൊരാശ്ലേഷമൊന്നുതാന-

തറിയിക്കുവാനുള്ള ഭാഷ 

ഒരു ഹൃദ്യ ആശ്ലേഷ ഭാഷ.
 

അണപൊട്ടിയൊഴുകുമെൻ പ്രണയവും മൗനവും 

ആലിംഗനത്തിലെ ചുംബനമായ് 

എന്റെ സ്നേഹ പ്രതീകത്തിൻ ചുംബനമായ് 

എൻ മൗന പ്രണയത്തിൻ സമ്മാനമായ്