മില്യനടിച്ച് അനു സിതാരയുടെ പ്രണയപ്പാട്ട്; തിളങ്ങി അമിത് ചക്കാലയ്ക്കലും, വിഡിയോ

അമിത് ചക്കാലയ്ക്കൽ, അനു സിതാര എന്നിവരെ പ്രധാന കഥാപാത്രങ്ങളാക്കി അജിത് തോമസ് സംവിധാനം ചെയ്യുന്ന ‘സന്തോഷം’ എന്ന ചിത്രത്തിലെ പുതിയ ഗാനം യൂട്യൂബിൽ തരംഗമാകുന്നു. ‘ശ്വാസമേ’ എന്നു തുടങ്ങുന്ന പ്രണയഗാനമാണ് ആസ്വാദകഹൃദയങ്ങൾ കീഴടക്കുന്നത്. കെ.എസ്.ഹരിശങ്കറും നിത്യ മാമ്മനും ചേർന്നാലപിച്ച ഗാനം പുറത്തിറങ്ങി മൂന്ന് ദിവസത്തിനകം 1 മില്യനിലധികം പ്രേക്ഷകരെ നേടി. വിനായക് ശശികുമാർ വരികൾ കുറിച്ച പാട്ടിന് പി.എസ്.ജയഹരിയാണ് ഈണമൊരുക്കിയത്. 

പുറത്തിറങ്ങിയപ്പോൾ മുതൽ മികച്ച പ്രേക്ഷകസ്വീകാര്യതയാണു പാട്ടിനു ലഭിച്ചുകൊണ്ടിരിക്കുന്നത്. ഹരിശങ്കറിന്റെ ആലാപനം ആദ്യ കേൾവിയിൽ തന്നെ ഹൃദയത്തിൽ പതിയുന്നുവെന്നാണ് ആസ്വാദകപക്ഷം. മനോഹരമായ ദൃശ്യാവിഷ്കാരവും പാട്ടിനെ വേഗത്തിൽ സ്വീകാര്യമാക്കി. മനോരമ മ്യൂസിക് പുറത്തിറക്കിയ ‘ശ്വാസമേ’ ഗാനം ഇപ്പോൾ ട്രെൻഡിങ്ങിലാണ്. 

ജീത്തു ജോസഫ്, സുജിത് വാസുദേവ് എന്നിവർക്കൊപ്പം സംവിധാനസഹായിയായി പ്രവർത്തിച്ച അജിത്തിന്റെ ആദ്യ സംവിധാനസംരംഭമാണ് ‘സന്തോഷം’. മെമ്മറീസ്, ദൃശ്യം, പാപനാശം തുടങ്ങിയ സിനിമകളുടെ അസോസിയേറ്റ് ഡയറക്ടർ ആയിരുന്നു അദ്ദേഹം. മീസ്-എൻ-സീൻ എന്റർടെയ്ൻമെന്റിന്റെ ബാനറിൽ ഇഷ പട്ടാലി, അജിത് തോമസ് എന്നിവർ ചേർന്ന് നിർമിക്കുന്ന ഈ ചിത്രത്തിൽ കലാഭവൻ ഷാജോൺ, മല്ലിക സുകുമാരൻ, ആശ അരവിന്ദ്, ബേബി ലക്ഷ്മി തുടങ്ങിയവരും അഭിനയിക്കുന്നു.