സിക്കിം: 40 മൃതദേഹങ്ങൾ കണ്ടെടുത്തെന്ന് ബംഗാൾ

ഗാങ്ടോക് ∙ സിക്കിമിൽ മിന്നൽ പ്രളയത്തിൽ മരിച്ചവരുടെ എണ്ണം 74 ആയി. പ്രളയമുണ്ടായ ടീസ്റ്റ നദി ഒഴുകിയെത്തുന്ന വടക്കൻ ബംഗാളിൽ നിന്ന് 40 മൃതദേഹങ്ങൾ കണ്ടെടുത്തതായി ബംഗാൾ സർക്കാർ അറിയിച്ചതോടെയാണിത്. സിക്കിമിൽ നിന്ന് 34 മൃതദേഹങ്ങൾ കണ്ടെടുത്തിരുന്നു. കാണാതായവരിൽ 105 പേരെ ഇനിയും കണ്ടെത്താനുണ്ട്. 

22 സൈനികരെ കാണാതായതിൽ 10 പേരു‍ടെ മൃതദേഹങ്ങൾ കണ്ടെടുത്തു. വടക്കൻ സിക്കിമിൽ കുടുങ്ങിക്കിടന്ന 7 കുട്ടികൾ ഉൾപ്പെടെ 77 വിനോദസഞ്ചാരികളെ വ്യോമസേന ഹെലികോപ്റ്ററിൽ രക്ഷപ്പെടുത്തി. 63 വിദേശികൾ ഉൾപ്പെടെ രണ്ടായിരത്തോളം സഞ്ചാരികൾ നോർത്ത് സിക്കിമിൽ കുടുങ്ങിയിട്ടുണ്ട്. നാട്ടുകാരുടെ സംരക്ഷണയിലാണിവർ.