പത്രക്കടലാസിന്റെ കസ്റ്റംസ് തീരുവ ഒഴിവാക്കണം: ഐഎൻഎസ്
Mail This Article
ന്യൂഡൽഹി ∙ പത്രക്കടലാസിനുള്ള 5% കസ്റ്റംസ് ഡ്യൂട്ടി അടിയന്തരമായി പിൻവലിക്കണമെന്ന് ഇന്ത്യൻ ന്യൂസ്പേപ്പർ സൊസൈറ്റി (ഐഎൻഎസ്) കേന്ദ്രസർക്കാരിനോട് ആവശ്യപ്പെട്ടു. രാജ്യാന്തര പ്രശ്നങ്ങൾ, രൂപയുടെ മൂല്യത്തിലെ ഇടിവ്, കസ്റ്റംസ് തീരുവ എന്നിവ മൂലം പത്രക്കടലാസിന്റെ വില ഉയർന്നനിലയിലാണെന്നും ലഭ്യതക്കുറവുണ്ടെന്നും ഐഎൻഎസ് ചൂണ്ടിക്കാട്ടി.
റഷ്യ–യുക്രെയ്ൻ സംഘർഷവും ചെങ്കടലിലെ പ്രശ്നങ്ങളും അടക്കം രാജ്യാന്തര വിതരണശൃംഖലയെ ബാധിച്ചു. പത്രക്കടലാസ് വിതരണം ചെയ്യുന്ന കമ്പനികൾ നേരത്തേ ഉറപ്പിച്ച ഓർഡറുകൾ പോലും റദ്ദാക്കുന്ന അവസ്ഥയുണ്ടായി. പല ന്യൂസ്പ്രിന്റ് മില്ലുകളും ഉൽപാദനം നിർത്തിവയ്ക്കുകയോ പൂർണമായും അവസാനിപ്പിക്കുകയോ ചെയ്തു.
ലോകത്തിലെ ഏറ്റവും വലിയ ജനാധിപത്യരാജ്യമെന്ന നിലയിൽ ഇന്ത്യയിൽ അച്ചടിമാധ്യമങ്ങൾ നിലനിൽക്കേണ്ടത് അനിവാര്യമാണ്. ഓൺലൈൻ ഇടങ്ങളിൽ വ്യാജവിവരങ്ങൾ പ്രചരിക്കുമ്പോൾ അച്ചടിമാധ്യമങ്ങൾ വിശ്വാസ്യത നിലനിർത്തുന്നു. കസ്റ്റംസ് തീരുവ ഒഴിവാക്കുന്നത് അച്ചടിമാധ്യമ വ്യവസായത്തിന് വലിയ ആശ്വാസമേകുമെന്നും ഐഎൻഎസ് പ്രസിഡന്റ് രാകേഷ് ശർമ പറഞ്ഞു.