'പാവങ്ങള്‍ക്കു നല്‍കാത്ത സൗജന്യ കിറ്റ് യുഡിഎഫ് ജനപ്രതിനിധികളും സ്വീകരിക്കില്ല'

തിരുവനന്തപുരം ∙ ഓണത്തോടനുബന്ധിച്ച് എംഎല്‍എമാര്‍ക്കും എംപിമാര്‍ക്കും സപ്ലൈകോ നല്‍കുന്ന സൗജന്യ കിറ്റ് യുഡിഎഫ് ജനപ്രതിനിധികള്‍ സ്വീകരിക്കില്ലെന്ന് പ്രതിപക്ഷ നേതാവ് വി.ഡി. സതീശന്‍. കടുത്ത സാമ്പത്തിക പ്രതിസന്ധി കാരണം മഞ്ഞ റേഷന്‍ കാര്‍ഡ് ഉടമകള്‍ക്കു മാത്രമാണ് ഇത്തവണ ഓണക്കിറ്റ് നല്‍കുന്നത്. അതുതന്നെ പൂര്‍ണതോതില്‍ നല്‍കാന്‍ കഴിഞ്ഞിട്ടുമില്ല. സാധാരണക്കാര്‍ക്കും പാവങ്ങള്‍ക്കും നല്‍കാത്ത സൗജന്യ കിറ്റ് യുഡിഎഫ് ജനപ്രതിനിധികളും സ്വീകരിക്കില്ല. ഇക്കാര്യം സപ്ലൈകോയെ അറിയിച്ചിട്ടുണ്ടെന്നും അദ്ദേഹം പറഞ്ഞു.

നേരത്തെ, ഓണക്കിറ്റ് വിതരണം അടക്കം വൈകിച്ച് സര്‍ക്കാര്‍ ഓണം സങ്കടകരമാക്കിയെന്ന് പ്രതിപക്ഷ നേതാവ് പറഞ്ഞിരുന്നു. സിവില്‍ സപ്ലൈസ് കോര്‍പറേഷനെ സര്‍ക്കാര്‍ ദയാവധത്തിനു വിട്ടിരിക്കുകയാണെന്നും 3400 കോടിരൂപ കോര്‍പറേഷന് സര്‍ക്കാര്‍ കൊടുക്കാനുണ്ടെന്നും അദ്ദേഹം ചൂണ്ടിക്കാണിച്ചു. കാണം വിറ്റാലും ഓണം ഉണ്ണാനാകാത്ത അവസ്ഥയാണ് സംസ്ഥാനത്തെന്നും കഴിഞ്ഞദിവസം അദ്ദേഹം പ്രതികരിച്ചു.

English Summary: UDF Leaders won't accept free Onam kit: Opposition Leader VD Satheesan