‘4,000 എംപിമാരുടെ പിന്തുണയുണ്ടാകും’: ബിഹാറിൽ മോദിയെ പുകഴ്ത്തി, കാൽതൊട്ട് നിതീഷ് കുമാർ
Mail This Article
പട്ന∙ ബിഹാറിലെ നവാഡയിൽ തിരഞ്ഞെടുപ്പ് പ്രചാരണത്തിനെത്തിയ പ്രധാനമന്ത്രി നരേന്ദ്ര മോദിയെ വാനോളം പുകഴ്ത്തിയും കാലിൽ തൊട്ടും ബിഹാർ മുഖ്യമന്ത്രി നിതീഷ് കുമാർ. 25 മിനിറ്റ് നീണ്ടുനിന്ന പ്രസംഗത്തിനൊടുവിൽ 4,000 എംപിമാരുടെ പിൻബലത്തോടെ മോദി ഭരിക്കുമെന്നു പറയാനും നിതീഷ് മടിച്ചില്ല. ലോക്സഭയിലെ ആകെ സീറ്റുകൾ 543 ആണെന്നിരിക്കെയാണ് നാലായിരം എംപിമാരുടെ പിൻബലത്തോടെ എന്ന് നിതീഷ് പ്രസംഗിച്ചത്.
‘‘ഞങ്ങൾക്ക് നല്ല ഉറപ്പുണ്ട് നാലായിരം, അതിലധികം എംപിമാരുടെ പിന്തുണ അദ്ദേഹത്തിനുണ്ടാകും. നിങ്ങൾ വോട്ട് ചെയ്യില്ലേ..നിങ്ങളുടെ മുഴുവൻ വോട്ടും നൽകണം.’’– നിതീഷ് പറഞ്ഞു. 400 സീറ്റുകളാണ് ഈ തിരഞ്ഞെടുപ്പിൽ ബിജെപി ലക്ഷ്യമിടുന്നത്.
നിതീഷ് കുമാറിന്റെ പ്രസംഗത്തിനു ശേഷമാണു മോദി പ്രസംഗിക്കാൻ എഴുന്നേറ്റത്. മികച്ച പ്രസംഗമാണ് നടത്തിയതെന്നും തനിക്ക് പ്രസംഗിക്കാൻ ബാക്കിയൊന്നും വച്ചില്ലെന്നും പറഞ്ഞ് നിതീഷിനെ മോദിയും പ്രശംസിച്ചു.