കല്യാണം കൂടാൻ കറാച്ചി കിങ്സ് ക്യാംപ് വിട്ട് പൊള്ളാർഡ് ഇന്ത്യയിലെത്തി, രോഷത്തിൽ പാക്ക് ആരാധകർ

അഹമ്മദാബാദ്∙ ആനന്ദ് അംബാനി– രാധിക മെർച്ചന്റ് വിവാഹത്തിൽ പങ്കെടുക്കുന്നതിനായി പാക്കിസ്ഥാൻ സൂപ്പർ ലീഗ് ടീം ക്യാംപ് വിട്ട് വെസ്റ്റിൻഡീസ് സൂപ്പർ താരം കീറൺ പൊള്ളാർഡ്. പിഎസ്എല്ലിൽ കറാച്ചി കിങ്സിന്റെ താരമായ പൊള്ളാർഡ് ടൂർണമെന്റിനിടെ ടീം ക്യാംപ് വിട്ട് ഇന്ത്യയിലെത്തുകയായിരുന്നു. വിവാഹത്തിന്റെ ഭാഗമാകാൻ വേണ്ടി മത്സരങ്ങൾ ഉപേക്ഷിച്ച പൊള്ളാർഡിനെതിരെ പാക്കിസ്ഥാൻ ആരാധകരുടെ രോഷം ഉയരുകയാണ്.

ഇന്ത്യൻ താരങ്ങളായ രോഹിത് ശർമ, എം.എസ്. ധോണി, ഹാർദിക് പാണ്ഡ്യ, സൂര്യകുമാർ യാദവ്, ഇഷാൻ കിഷൻ എന്നിവരും ആഡംബര വിവാഹത്തിൽ പങ്കെടുക്കാന്‍ ഗുജറാത്തിലെ ജാംനഗറിലെത്തിയിരുന്നു. പിഎസ്എൽ 2024ലെ കറാച്ചി കിങ്സിന്റെ ടോപ് സ്കോററാണ് പൊള്ളാർഡ്. അഞ്ച് മത്സരങ്ങളിൽനിന്നായി 196 റൺസാണ് വിൻഡീസ് ഓൾറൗണ്ടർ കറാച്ചി കിങ്സിനു വേണ്ടി നേടിയത്. വിവാഹച്ചടങ്ങുകൾക്കു ശേഷം താരം പാക്കിസ്ഥാനിലെത്തി ടീമിനൊപ്പം ചേരും.

ജാംനഗറിലെത്തിയ പൊള്ളാർ‌ഡിന്റെ ചിത്രങ്ങളും ദൃശ്യങ്ങളും സമൂഹമാധ്യമങ്ങളിൽ വൈറലാണ്. ക്വെറ്റ ഗ്ലാഡിയേറ്റേഴ്സിനെതിരെ ഫെബ്രുവരി 29ന് നടന്ന മത്സരത്തിൽ പൊള്ളാർഡ് കളിച്ചിരുന്നു. അതേസമയം ഞായറാഴ്ചത്തെ മുൾട്ടാൻ സുൽത്താൻസിനെതിരായ മത്സരം താരത്തിന് നഷ്ടമാകും. അംബാനിയുടെ ഉടമസ്ഥതയിലുള്ള മുംബൈ ഇന്ത്യൻസിന്റെ ബാറ്റിങ് പരിശീലകൻ കൂടിയാണ് പൊള്ളാർഡ്.