ഫാഷൻ ഗോൾഡ് നിക്ഷേപത്തട്ടിപ്പ്: രണ്ടുപേർക്കായി തിരച്ചിൽ നോട്ടിസ്
Mail This Article
കോഴിക്കോട്∙ ഫാഷൻ ഗോൾഡ് നിക്ഷേപത്തട്ടിപ്പിൽ ചോദ്യം ചെയ്യലിനു ഹാജരാകാത്ത മാനേജിങ് ഡയറക്ടർ ടി.കെ.പൂക്കോയ തങ്ങൾ, മകൻ എ.പി.ഇഷാം എന്നിവർക്കായി തിരച്ചിൽ നോട്ടിസ് (ലുക്കൗട്ട് നോട്ടിസ്) പുറത്തിറക്കാൻ എൻഫോഴ്സ്മെന്റ് ഡയറക്ടറേറ്റ്. ചോദ്യം ചെയ്യലിനു ഹാജരാകാനുള്ള നോട്ടിസ് ഇരുവരും സ്ഥലത്തില്ലാത്തതിനാൽ മടങ്ങിയിരുന്നു.
ഇതിനു പിന്നാലെയാണ് തിരച്ചിൽ നോട്ടിസ് പുറത്തിറക്കാനുള്ള ഇഡിയുടെ നീക്കം. 22 ഡയറക്ടർമാരെ ചോദ്യം ചെയ്യാൻ വിളിപ്പിച്ചെങ്കിലും ഇതുവരെ രണ്ടുപേരാണ് എൻഫോഴ്സ്മെന്റ് ഡയറക്ടറേറ്റ് കോഴിക്കോട് ഓഫിസിൽ ഹാജരായത്. മാനേജിങ് ഡയറക്ടറായിരുന്ന ടി.കെ.പൂക്കോയ തങ്ങളെ ചോദ്യം ചെയ്താൽ മാത്രമേ തട്ടിപ്പിന്റെ വ്യാപ്തി വ്യക്തമാകൂ എന്ന നിഗമനത്തിലാണ് ഇഡി.
മകൻ എ.പി.ഇഷാം പയ്യന്നൂർ ശാഖാ മാനേജരായിരുന്നു. ചോദ്യം ചെയ്യലിന് ഹാജരായ ഡയറക്ടർമാർ ഇരുവർക്കുമെതിരെ മൊഴി നൽകിയിട്ടുണ്ട്. ഫാഷൻ ഗോൾഡ് നിക്ഷേപത്തട്ടിപ്പ് അന്വേഷിക്കുന്ന പ്രത്യേക സംഘത്തിനും പൂക്കോയ തങ്ങളെയും മകനെയും കണ്ടെത്താൻ കഴിഞ്ഞിട്ടില്ല. ഈ സാഹചര്യത്തിലാണ് തിരച്ചിൽ നോട്ടിസ് പുറത്തിറക്കുന്നത്.
