യുഎഇയിലെ മഴ: കോഴിക്കോട്ടെ 7 വിമാന സർവീസുകൾ റദ്ദാക്കി, പലതും വൈകി

കരിപ്പൂർ ∙ യുഎഇയിലെ മഴമൂലം കോഴിക്കോട് വിമാനത്താവളം കേന്ദ്രീകരിച്ചുള്ള 7 സർവീസുകൾ റദ്ദാക്കി. പല വിമാന സർവീസുകളും വൈകി. 6 രാജ്യാന്തര സർവീസുകളും ഒരു ആഭ്യന്തര സർവീസുമാണ് റദ്ദാക്കിയത്. എയർ ഇന്ത്യ എക്സ്പ്രസിന്റെ ഇന്നലെ രാത്രി 7.25നുള്ള കോഴിക്കോട് –ഷാർജ വിമാനവും എട്ടിനുള്ള കോഴിക്കോട് –ദുബായ് വിമാനവും റദ്ദാക്കി. ഷാർജയിൽനിന്നു വൈകിട്ട് 4.30ന് കോഴിക്കോട് എത്തേണ്ട വിമാനവും റദ്ദാക്കി.

ഇൻഡിഗോയുടെ 3 രാജ്യാന്തര സർവീസും ഒരു ആഭ്യന്തര സർവീസും റദ്ദാക്കി. ദുബായിൽനിന്ന് ഇന്നലെ രാവിലെ കോഴിക്കോട്ട് എത്തേണ്ട സർവീസ് റദ്ദാക്കിയതിനെത്തുടർന്ന് ഈ വിമാനത്തിന്റെ രാവിലത്തെ ബെംഗളൂരു സർവീസും റദ്ദാക്കി.ഇന്നലെ രാത്രി 10.15നുള്ള ഇൻഡിഗോയുടെ കോഴിക്കോട് –ദുബായ് സർവീസും ഇന്നു രാവിലെ 8.30ന് കോഴിക്കോട്ടെത്തേണ്ട വിമാന സർവീസും റദ്ദാക്കി.