കുട്ടിയാനയെ കൊണ്ട് പോകാൻ അര കിലോ മീറ്റർ റോഡ് വെട്ടി; വനം വകുപ്പ് ഏറ്റെടുത്തതു ശ്രമകരമായ ദൗത്യം...

വിതുര∙ വാമനപുരം നദിക്കരയിൽ ചരിഞ്ഞ കാട്ടാനയുടെ സമീപത്തു ചുറ്റിത്തിരിഞ്ഞ കുട്ടിയാനയെ കോട്ടൂർ കാപ്പുകാട് ആന പരിശീലന കേന്ദ്രത്തിലേക്ക് കൊണ്ടു പോകാൻ വനം വകുപ്പ് ഏറ്റെടുത്തതു ശ്രമകരമായ ദൗത്യം. നദിക്കരയിലെ സ്വകാര്യ പുരയിടത്തിലേക്കു വാഹനം എത്തിക്കാൻ പ്രധാന റോഡിൽ നിന്നും അര കിലോ മീറ്റർ റോഡ് മണ്ണുമാന്തി ഉപയോഗിച്ചു താൽക്കാലികമായി നിർമിച്ചു.

തുടർന്നാണു ആർആർടിയുടെ വാഹനം സംഭവ സ്ഥലത്തെത്തിയത്. ഡിഎഫ്ഒ: ഐ.കെ. പ്രദീപ് കുമാർ, പാലോട് വനം റേഞ്ച് ഓഫിസർ ബി. അജിത് കുമാർ, സെക്‌ഷൻ വനം ഓഫിസർമാരായ എം.എസ്. റീഗൻ, എസ്. പ്രഭാത് കുമാർ എന്നിവരുടെ നേതൃത്വത്തിൽ വനം വകുപ്പ് സംഘവും ഇൻസ്പെക്ടർ എസ്. ശ്രീജിത്ത്, സബ് ഇൻസ്പെക്ടർ എസ്.എൽ. സുധീഷ് എന്നിവരുടെ നേതൃത്വത്തിൽ പൊലീസ് സംഘവും സ്ഥലത്ത് എത്തിയിരുന്നു.