കൊട്ടാക്കമ്പൂർ ഭൂമി കയ്യേറ്റം: ജോയ്സ് ജോർജ് എംപിക്ക് വീണ്ടും നോട്ടിസ് അയച്ച് രേണുരാജ്

തൊടുപുഴ ∙ കൊട്ടാക്കമ്പൂർ ഭൂമി കയ്യേറ്റ വിഷയത്തിൽ രേഖകൾ ഹാജരാക്കമെന്നാവശ്യപ്പെട്ട് ജോയ്സ് ജോർജ് എംപിക്ക് ദേവികുളം സബ് കലക്ടർ ഡോ. രേണു രാജ് വീണ്ടും നോട്ടിസ് അയച്ചു. മാർച്ച് ഏഴിന് കൊട്ടാക്കമ്പൂരിലെ ഭൂമിയുടെ ഉടമസ്ഥത തെളിയിക്കുന്ന രേഖകൾ ഹാജരാക്കണമെന്ന് നോട്ടിസിൽ ആവശ്യപ്പെട്ടിട്ടുണ്ട്. വിവിധ ഘട്ടങ്ങളിലായി ആറാം തവണയാണ് ദേവികുളം സബ് കലക്ടർ ഭൂരേഖകൾ ഹാജരാക്കണമെന്ന് ആവശ്യപ്പെട്ട് എംപിക്ക് നോട്ടിസ് അയയ്ക്കുന്നത്.

പട്ടയത്തിലെ ക്രമക്കേടുകളും പട്ടയ പരിശോധന നടപടിയോടുള്ള നിസഹകരണവും ചൂണ്ടിക്കാട്ടിയാണ് ജോയ്സ് ജോർജ് എംപിയുടെയും ബന്ധുക്കളുടെയും പട്ടയം ദേവികുളം മുൻ സബ് കലക്ടർ വി.ആർ. പ്രേംകുമാർ റദ്ദാക്കിയത്. മുൻ സബ് കലക്ടർ വി. ശ്രീറാം, നേരത്തെ രണ്ട് തവണ എംപിക്കു നോട്ടിസ് അയച്ചിരുന്നു.