വെർമിസെല്ലി ഉപ്പുമാവ് ഉണ്ടെങ്കിൽ പ്രഭാത ഭക്ഷണം ഗംഭീരം

കുട്ടികളുടെ പ്രിയപ്പെട്ട വെർമിസെല്ലി കൊണ്ട് രസികൻ രുചിയിലൊരു ഉപ്പുമാവ് തയാറാക്കാം.

ചേരുവകൾ :

• വെജിറ്റബിൾ ഓയിൽ - 4 ടേബിൾസ്പൂൺ 
• സേമിയ - 1 1/2 കപ്പ്‌ 
• കടുക് - 1/2 ടീസ്പൂൺ 
• ഇഞ്ചി ചെറുതായി അരിഞ്ഞത് - 1 ടീസ്പൂൺ 
• പച്ചമുളക് - 3 എണ്ണം 
• സവാള അരിഞ്ഞത് - 2 ചെറുത്‌ 
• ഉപ്പ് – ആവശ്യത്തിന് 
• കാരറ്റ് ചെറുതായി അരിഞ്ഞത് - 1 എണ്ണം 
• കാപ്‌സിക്കം ചെറുതായി അരിഞ്ഞത്- ഒരെണ്ണത്തിന്റെ പകുതി
• കറിവേപ്പില – ആവശ്യത്തിന് 
• മഞ്ഞൾപ്പൊടി - 1/2 ടീസ്പൂൺ 
• കായം - 1/8 ടീസ്പൂൺ 
• മുളകുപൊടി - 1/2 ടീസ്പൂൺ

തയാറാക്കുന്ന വിധം :

• ഒരു ഫ്രൈയിങ് പാനിൽ 2 ടേബിൾസ്പൂൺ ഓയിൽ ഒഴിച്ചശേഷം സേമിയ ഇട്ട് ചെറുതീയിൽ ലൈറ്റ് ബ്രൗൺ നിറം ആകുന്നത് വരെ ഇളക്കികൊടുക്കുക.

• സേമിയ ആറിയ ശേഷം തിളച്ച വെള്ളത്തിൽ ഇട്ട് 3 മിനിറ്റ് വരെ വേവിച്ച് എടുക്കുക. സേമിയ വെന്ത ശേഷം വെള്ളം ഊറ്റി മാറ്റി വയ്ക്കുക.

• ഒരു പാനിൽ 2 ടേബിൾസ്പൂൺ ഓയിൽ ഒഴിച്ച ശേഷം കടുക് ഇട്ട് പൊട്ടിക്കുക. ഇതിൽ ഇഞ്ചിയും പച്ചമുളകും സവാളയും ആവശ്യത്തിന് ഉപ്പും ചേർത്ത് വഴറ്റുക. സവാള വഴറ്റിയ ശേഷം കാരറ്റും കാപ്‌സിക്കവും ചേർത്ത് 2 മിനിറ്റ് അടച്ച് വച്ച് വേവിച്ച് എടുക്കുക.

• ഇതിൽ മഞ്ഞൾപ്പൊടി, കായപ്പൊടി, മുളകുപൊടി, കറിവേപ്പില എനിവ ചേർത്ത് 1 മിനിറ്റ് ഇളക്കുക. വേവിച്ച സേമിയ കൂടി ഇതിലോട്ട് ഇട്ട് നന്നായി യോചിപ്പിക്കുക.

വളരെ എളുപ്പത്തിൽ ഒരടിപൊളി ബ്രേക്ഫാസ്റ്റ്  തയാർ. 

English Summary : Semiya Upma Recipe for Breakfast.