ടൗണല്ല, ഇതു സിറ്റി; ലൂട്ടൺ ടൗണിനെതിരെ മാഞ്ചസ്റ്റർ സിറ്റിക്ക് ജയം (5–1)

മാഞ്ചസ്റ്റർ ∙ ഇംഗ്ലിഷ് പ്രിമിയർ ലീഗ് ഫുട്ബോൾ കിരീടപ്പോരാട്ടത്തിൽ വിട്ടുകൊടുക്കാൻ ഒരുക്കമല്ലെന്നു പ്രഖ്യാപിച്ച് മാഞ്ചസ്റ്റർ സിറ്റി. ലൂട്ടൺ ടൗണിനെതിരായ മത്സരത്തിൽ മാഞ്ചസ്റ്റർ സിറ്റിക്ക് 5–1 വിജയം.

എർലിങ് ഹാളണ്ട് സീസണിലെ 20–ാം ലീഗ് ഗോൾ നേടിയ മത്സരത്തിൽ, ഡെയ്കി ഹാഷിയോകയുടെ സെൽഫ് ഗോളിലാണു സിറ്റി സ്കോറിങ് തുടങ്ങിയത്. മാറ്റിയോ കൊവാചിച്ച്, ജെറമി ഡോക്കു, ജോസ്കോ ഗവാർഡിയോൾ എന്നിവരും സിറ്റിക്കായി ഗോൾ നേടി. റോസ് ബാർക്‌ലിയുടേതാണ് ലൂട്ടണിന്റെ ആശ്വാസഗോൾ.   നിലവിൽ ഒന്നാം സ്ഥാനത്താണെങ്കിലും ലിവർപൂൾ, ആർസനൽ ടീമുകൾ  മത്സരങ്ങൾ ജയിച്ചാൽ സിറ്റി വീണ്ടും മൂന്നാം സ്ഥാനത്താകും.