ജോക്കോ ഈസ് ഗോൾഡ് ; ജോക്കോവിച്ച് ടെന്നിസിലെ പ്രായമേറിയ ഒന്നാംനമ്പർ

ലണ്ടൻ ∙ പ്രായംകൂടുന്തോറും വീര്യംകൂടുന്ന നൊവാക് ജോക്കോവിച്ചിന്റെ റാക്കറ്റിൽ മറ്റൊരു ലോക റെക്കോർഡ് കൂടി. സിംഗിൾസ് ടെന്നിസിലെ പ്രായമേറിയ ഒന്നാംറാങ്കുകാരനെന്ന റെക്കോർ‍ഡ് സ്വന്തമാക്കിയ സെർബിയൻ താരം ഈ നേട്ടത്തിൽ മറികടന്നത് സ്വിസ് ഇതിഹാസം റോജർ ഫെഡററെയാണ്. എടിപി പുരുഷ സിംഗിൾസ് റാങ്കിങ്ങിൽ ഒന്നാംസ്ഥാനക്കാരനായി 419–ാം ആഴ്ചയിലേക്കു കടക്കുമ്പോൾ ജോക്കോവിച്ചിന്റെ പ്രായം 36 വയസ്സും 321 ദിവസവുമാണ്. 310 ആഴ്ചക്കാലം ലോക ഒന്നാംറാങ്കിൽ തുടർന്ന റോജർ ഫെ‍ഡറർ 2018 ജൂണിലാണ് അവസാനം ഈ നേട്ടം കൈവരിച്ചത്. 

2011 ജൂലൈ നാലിന് 24–ാം വയസ്സിലാണ് ജോക്കോവിച്ച് കരിയറിൽ ആദ്യമായി ഒന്നാം റാങ്കിലെത്തുന്നത്. കൂടുതൽ ആഴ്ചക്കാലം ഒന്നാംറാങ്ക് സ്വന്തമാക്കിയതിന്റെ റെക്കോർ‍ഡും ജോക്കോവിച്ചിന്റെ പേരിലാണ്. വനിതാ താരം സ്റ്റെഫി ഗ്രാഫിനെ (377 ആഴ്ചകൾ) കഴിഞ്ഞവർഷം  മറികടന്നിരുന്നു. ‌