അനുദിനം കുതിച്ചുയരുകയാണ് ചികിത്സാചെലവ്. മരുന്നിന്റെയും മറ്റ് അനുബന്ധ വസ്തുക്കളുടെയും വിലക്കയറ്റം ആരുടെയും ഉറക്കം കെടുത്തും. മറ്റെന്തു ചെലവും ചുരുക്കാം, കർശനമായി നിയന്ത്രിക്കാം. പക്ഷേ അസുഖങ്ങൾ വരുമ്പോള്‍ ഇതൊന്നും നടക്കില്ല. എന്താണ് പോംവഴി.
ചികിത്സാ ചെലവിനെക്കുറിച്ചുള്ള ഭയത്തിന് പരിഹാരമാണ് മെഡിക്ലെയിം പോളിസികൾ. വളരെ ചെറിയ ഒരു തുക വർഷാവർഷം പ്രീമിയമായി നൽകി ഒരു മെഡിക്ലെയിം പോളിസി എടുത്താൽ ആശുപത്രിച്ചെലവുകളെപ്പറ്റി പിന്നീട് ആവലാതിപ്പെടുകയേ വേണ്ട. നിങ്ങൾ ജീവനെപ്പോലെ സ്നേഹിക്കുന്ന കുടുംബാംഗങ്ങൾക്ക് ആർക്ക് അസുഖം വന്നാലും ലഭ്യമായ മികച്ച ചികിത്സതന്നെ അവർക്കായി നൽകാം. പണം ഇനി മുതൽ ഒരു തടസ്സമേ ആകില്ല. ഫിനാൻഷ്യൽ പ്ലാനിങ്ങിൽ ഏറ്റവും അത്യാവശ്യമാണ് മെഡിക്ലെയിം പോളിസികൾ. കാരണം ഇതില്ലെങ്കിൽ കുടുംബത്തിൽ ആർക്കെങ്കിലും അസുഖം വന്നാൽ സാമ്പത്തിക നില ആകെ താറുമാറാകും.
എന്താണ് മെഡിക്ലെയിം പോളിസികൾ
ഒരു നിശ്ചിത തുക വർഷാവർഷം പ്രീമിയം നൽകി ഒരു വ്യക്തിയും കുടുംബാംഗങ്ങളും ഇൻഷുറൻസ് കവറേജ് നേടുക. കവറേജ് നേടിയവർ അസുഖത്തെതുടർന്ന് ആശുപത്രിയിൽ പ്രവേശിക്കപ്പെട്ടാൽ കവറേജിന് തുല്യമായ തുകയ്ക്കുള്ള ചികിത്സാചെലവുകൾ ഇൻഷുറൻസ് കമ്പനി നൽകും.
പ്രീമിയം അടയ്ക്കുന്നത് ഒരു വർഷത്തേക്ക് ആണ്. ഒരു വർഷം കവിയുമ്പോൾ അടുത്ത വർഷത്തേക്ക് പ്രീമിയം അടച്ച് പോളിസി പുതുക്കണം. ഇക്കാലയളവിൽ അസുഖങ്ങൾ വരാത്തതിനെത്തുടർന്നോ ആശുപത്രിയിൽ പ്രവേശിക്കപ്പെടേണ്ട രീതിയിൽ ചികിത്സ വേണ്ടിവന്നില്ലെങ്കിലോ ഇൻഷുറൻസ് കമ്പനിയിൽ നിന്ന് പണമൊന്നും കിട്ടില്ല. പോളിസിയുടെ കാലാവധി വർഷത്തിൽ ക്ലെയിം ഒന്നും വന്നില്ല എങ്കിൽ ഒരു നിശ്ചിത ശതമാനം തുക കവറേജ് തുകയോടൊപ്പം കൂട്ടിത്തരും.
എന്തു ചെലവു വരും
നാൽപതു വയസ്സ് പ്രായമുള്ള ഭർത്താവും മുപ്പത് വയസ്സ് പ്രായമുള്ള ഭാര്യയും അഞ്ച് വയസ്സ് പ്രായമുള്ള കുട്ടിയും അടങ്ങുന്ന കുടുംബത്തിന്റെ കാര്യമെടുക്കാം. ഒരു ലക്ഷം രൂപയുടെ കവറേജിന് പ്രീമിയം വെറും 3000 രൂപയും രണ്ടു ലക്ഷം രൂപയുടെ കവറേജിന് 6000 രൂപയും മൂന്ന് ലക്ഷം രൂപയുടെ കവറേജിന് 7000 രൂപയുമാണ് പൊതുമേഖലാ ഇൻഷുറൻസ് കമ്പനികൾ ഈടാക്കുന്ന ഏകദേശ പ്രീമിയം.
ഇതേപോലെ നിങ്ങളുടെയും കുടുംബാംഗങ്ങളുടെയും പ്രായം വിലയിരുത്തി ഇൻഷുറൻസ് കമ്പനി ഉദ്യോഗസ്ഥരോ ഏജന്റുമാരോ പോളിസി എടുക്കാൻ എത്ര പ്രീമിയം തുക വേണം എന്നു പറഞ്ഞു തരും.
പോളിസികൾ എത്രവിധം
∙ ഇൻഡംനിറ്റി പോളിസി
ചികിത്സയ്ക്കാവശ്യമായ തുക, സം അഷ്വേഡിന്റെ പരിധിക്കു വിധേയമായി ഇത്തരം പോളിസികളിൽ നിന്ന് ലഭിക്കും. കൂടാതെ ഒരു ക്ലെയിമിൽ തന്നെ അഷ്വേഡ് മുഴുവനായും ഉപയോഗപ്പെടുത്തണമെന്നില്ല.
∙ ബെനിഫിറ്റ് പോളിസി
ഇൻഷ്വർ ചെയ്യപ്പെട്ട ആൾക്ക് ആരോഗ്യപ്രശ്നം ഉണ്ടാകുമ്പോൾ ചികിത്സാചെലവ് പരിഗണിക്കാതെ സം അഷ്വഡ് മുഴുവനായും നൽകുകയും പദ്ധതി അവസാനിപ്പിക്കുകയും ചെയ്യുന്നു. എന്നതാണ് ഇത്തരം പോളിസികളുടെ പ്രത്യേകത.
വ്യക്തിഗത ഇൻഷുറൻസ്
ഇൻഷ്വർ ചെയ്യപ്പെട്ട ആളിന് കുറഞ്ഞത് 24 മണിക്കൂറെങ്കിലും ആശുപത്രിവാസം വേണ്ടിവന്നാൽ ഇത്തരം പദ്ധതികളിൽ നിന്ന് ആനുകൂല്യം ലഭിക്കും. ഡോക്ടർ ഫീസ്, നഴ്സിങ് ഫീസ്, അനസ്തേഷ്യ ഫീസ് തുടങ്ങി ബ്ലഡ്, ഓക്സിജൻ മുതലായ ചെലവുകൾക്കു വരെ സം അഷ്വേഡ് പരിധിക്കു വിധേയമായി ലഭിക്കും. പോളിസിയിൽത്തന്നെ മറ്റു കുടുംബങ്ങളെക്കൂടി ഉൾപ്പെടുത്തി കവറേജ് ഉറപ്പുവരുത്താനുള്ള സംവിധാനവും ഉണ്ട്. ഇത്തരം പോളിസികൾ മിക്കതും നോ ക്ലെയിം ബോണസും നൽകും. അതായത് ഒരു വർഷം ക്ലെയിം ഒന്നും ഉണ്ടായില്ല എങ്കിൽ അടുത്ത വർഷം ചുരുങ്ങിയത് അഞ്ച് ശതമാനം തുകയുടെ കൂടുതൽ കവറേജ് ലഭിക്കും. കാഷ്‌ലെസ് സംവിധാനവും ലഭ്യമായ ഇത്തരം പോളിസികളിൽ സാധാരണയായി 24 മുതൽ 48 മാസങ്ങൾക്കു ശേഷമേ പോളിസിയെടുക്കുമ്പോൾ ഉണ്ടായിരുന്ന രോഗങ്ങൾക്ക് കവറേജ് ലഭിക്കൂ.
ഫാമിലി ഫ്ളോട്ടർ
എല്ലാ കുടുംബാംഗങ്ങൾക്കും നിശ്ചിത തുകയുടെ ആരോഗ്യരക്ഷ ഒറ്റ പോളിസിയിലൂടെ എടുക്കാവുന്ന സംവിധാനമാണ് ഇത്. എല്ലാവരെയും വ്യത്യസ്തമായി ഇൻഷ്വർ ചെയ്യുന്നതിനു പകരം സ്വീകരിക്കാവുന്ന രീതിയാണ്. ഫാമിലി ഫ്ളോട്ടർ ഏതെങ്കിലും അംഗത്തിലൂടെ ക്ലെയിം ഉണ്ടാവുകയാണെങ്കിൽ മറ്റുള്ളവർക്ക് ലഭ്യമാകുന്ന കവറേജ് ആനുപാതികമായി കുറയുന്ന രീതിയിലാണ് ഇത്തരം പദ്ധതികൾ രൂപകൽപ്പന ചെയ്തിരിക്കുന്നത്.
എല്ലാവർക്കും ഒരേ വർഷം ഒരേ പോലുള്ള ആരോഗ്യ പ്രശ്നങ്ങൾക്കു സാധ്യത കുറവാണെന്നിരിക്കെ ഇത്തരം പോളിസികളായിരിക്കും വ്യക്തിഗത പോളിസികളെക്കാൾ ലാഭകരം. എന്നിരുന്നാലും ഒരു വ്യക്തിക്ക് അനുയോജ്യമായ പദ്ധതി ഏതെന്ന് കണ്ടെത്താൻ തികച്ചും വ്യക്ത്യധിഷ്ഠിതമായ കാര്യങ്ങൾകൂടി പരിഗണിക്കേണ്ടതുണ്ട്.,
സീനിയർ കവറേജ്
കുറച്ചു കാലം വരെ 50–55 വയസ്സിനു മുകളിൽ പ്രായമുള്ളവർക്ക് ചേരുവാൻ കഴിയുന്ന ഹെൽത്ത് പോളിസികൾ കുറവായിരുന്നു. എന്നാൽ ഇന്ന് എല്ലാ ഹെൽത്ത് പോളിസികളിലും 65 വയസ്സുവരെയുള്ളവർക്ക് ചേരുവാന്‍ അവസരമുണ്ടാകണമെന്ന് ഐ. ആർ. ഡി. ഐ. നിബന്ധന കാരണം കമ്പനികൾ സീനിയർ സിറ്റിസൺസിന് ആവശ്യമായ പദ്ധതികൾ നൽകുന്നുണ്ട്. തുടക്കത്തിൽ ആരോഗ്യപരിശോധന ആവശ്യമായി വന്നേക്കാവുന്ന ഇത്തരം പദ്ധതികളിൽ കവറേജിൽ ഉൾപ്പെടാത്ത വ്യത്യസ്ത രോഗങ്ങൾ ഏതൊക്കെയാണെന്ന് പ്രത്യേകം ശ്രദ്ധിക്കേണ്ടതാണ്. ആശുപത്രിച്ചെലവിന്റെ നിശ്ചിത ശതമാനം പോളിസിയുടമതന്നെ അടയ്ക്കുന്ന സംവിധാനവും പല പോളിസികളുടെയും പ്രത്യേകതയാണ്.
മാരക രോഗങ്ങൾക്ക് കവറേജ്
ഹാർട്ട് അറ്റാക്ക്, കാൻസർ, സ്ട്രോക്ക്, വൃക്ക മാറ്റിവയ്ക്കൽ തുടങ്ങിയ രോഗങ്ങൾക്ക് ഹോസ്പിറ്റലിൽ അഡ്മിറ്റായിരുന്നത്രയും കാലം മാത്രം നോക്കി ആനുകൂല്യം തരുന്ന വ്യക്തിഗത പ്ലാനുകൾ അപര്യാപ്തമായിരിക്കും. അതായത് മാരകരോഗങ്ങൾക്കുള്ള (Critical illness) പ്രത്യേക പ്ലാനുകളായിരിക്കും ഇവിടെ കൂടുതൽ ഉപകാരപ്രദം. ഡോക്ടറുടെ സാക്ഷ്യപത്രം മാത്രം മതി ഇത്തരം പോളിസികളിൽ. ഈ ആനുകൂല്യം രോഗം കണ്ടെത്തി 30 ദിവസമെങ്കിലും രോഗി ജീവിച്ചിരിക്കണമെന്ന നിബന്ധനയ്ക്കു വിധേയമാണെന്നു മാത്രം.
പ്രീമിയം നോക്കിയാൽ മാത്രം പോര
ഒരു പോളിസിയുടെ മികവായി കുറഞ്ഞ പ്രീമിയം നിരക്കിനെ ഒരിക്കലും മാനദണ്ഡമാക്കരുത്. താരതമ്യപഠനത്തിനായി അത്തരം പോളിസികളെ പരിഗണിക്കാം. വ്യക്തിപരമായ വ്യത്യസ്ത അളവുകോലുകളുമായി പോളിസികളെ സമീപിക്കുക. പോളിസി എടുക്കും മുന്‍പ് ഇനി പറയുന്ന കാര്യങ്ങൾ നിങ്ങൾക്ക് ആവശ്യമുണ്ടോ എന്നു പരിശോധിക്കുക.
കാഷ്‌ലെസ് സൗകര്യം
ആശുപത്രിയിൽ പ്രവേശിക്കപ്പെട്ടാൽ വരുന്ന ചികിത്സാ ചെലവുകൾ ഇൻഷുറൻസ് കമ്പനി നേരിട്ട് ആശുപത്രികൾക്ക് നൽകുന്ന രീതിയാണിത്. 24 മണിക്കൂറിൽ കൂടുതൽ കിടത്തി ചികിത്സ വേണ്ടി വന്നാൽ ഈ സൗകര്യം ലഭ്യമാകും. ചികിത്സയുമായി ബന്ധപ്പെട്ടു വരുന്ന പരിശോധനകൾ, മരുന്നുകൾ തുടങ്ങിയ സകല ചെലവുകൾക്കുമുള്ള പണം കമ്പനി നൽകും. ഇത്തരത്തിൽ കാഷ്‌ലെസ് സൗകര്യമുള്ള പോളിസികൾ തിരഞ്ഞെടുക്കുക.
കോ–പെയ്മെന്റ്
ചികിത്സാചെലവ് എത്രയായാലും അതിന്റെ ഒരു ഭാഗം പോളിസി ഉടമ തന്നെ വഹിക്കേണ്ട വ്യവസ്ഥയാണ് കോ–പേയ്മെന്റ് വ്യവസ്ഥ. ചിലരിൽ 10 ശതമാനം, 15 ശതമാനം എന്നിങ്ങനെ കോ–പേയ്മെന്റ് നിരക്ക് വ്യത്യസ്തമായിരിക്കും. ഇത്തരത്തിൽ ചികിത്സാ ചെലവിന്റെ ഒരു ഭാഗം വഹിക്കുന്നതിൽ ബുദ്ധിമുട്ടില്ലെങ്കിൽ അത്തരം പോളിസികളെ പരിഗണിക്കാം. അതല്ല ഇത്തരത്തിൽ ചികിത്സ വേണ്ടിവരുമ്പേൾ പണം കണ്ടെത്താൻ ബുദ്ധിമുട്ടാണെന്ന് കരുതുന്നുവെങ്കിൽ കോ–പേയ്മെന്റ് വ്യവസ്ഥയില്ലാത്ത പോളിസി തന്നെ തിര‍ഞ്ഞെടുക്കണം. ഏതു പോളിസി എടുത്താലും ഇത്തരത്തിലുള്ള വ്യവസ്ഥ ഉണ്ടോ എന്ന് അറിഞ്ഞിരിക്കണം.
എക്സസ് ലിമിറ്റ്
ചില പോളിസികളിൽ ചികിത്സാ ചെലവ് അല്ലെങ്കില്‍ ക്ലെയിം തുക ഒരു നിശ്ചിത തുകയിൽ കൂടുതൽ ആണെങ്കിലേ കമ്പനികൾ പണം നൽകൂ. അതായത് പോളിസിയുടെ എക്സസ് ലിമിറ്റ് 5,000 രൂപയാണെന്ന് കരുതുക. അതിനർത്ഥം 5,000 രൂപ വരെ ചികിത്സാ ചെലവ് വന്നാൽ ക്ലെയിം ചെയ്യാൻ പറ്റില്ല. ഈ പോളിസിയിൽ ഒരു ക്ലെയിം നടത്തണമെങ്കിൽ ചികിത്സാ ചെലവ് 5,000 രൂപയിൽ കൂടണം.
∙ നിലവിലുള്ള അസുഖം
പോളിസി എടുക്കുന്ന സമയത്ത് നമ്മളെ ഏതൊക്കെ അസുഖം ബാധിച്ചിട്ടുണ്ടെന്ന് അറിയണമെന്നില്ല. പോളിസിയിൽ ചേരും മുൻപ് മുൻകൂർ വൈദ്യപരിശോധന നടത്തേണ്ട ആവശ്യം ഉണ്ടാകാറില്ല. പക്ഷേ പോളിസി എടുത്ത ശേഷം അസുഖം വന്ന് ആശുപത്രിയിൽ ആയെന്ന് വിചാരിക്കുക. പരിശോധനയിൽ പോളിസി എടുക്കുന്നതിനു മുൻപേ ഈ അസുഖം ഉണ്ടെന്ന് തെളിഞ്ഞാൽ ക്ലെയിം കിട്ടില്ല. നിലവിലുള്ള അസുഖങ്ങൾക്ക് പോളിസി എടുത്തു കഴിഞ്ഞ് നിശ്ചിത വർഷം കഴിഞ്ഞാലേ ക്ലെയിം കിട്ടൂ. ചില പോളിസികളിൽ ഇതു മൂന്നു വര്‍ഷമാണെങ്കിൽ മറ്റു ചിലതിൽ ഇതു നാലു വർഷമായിരിക്കും.
∙ മുറിവാടക
ചില പോളിസികളിൽ മൊത്തം സം അഷ്വേഡിന്റെ നിശ്ചിത ശതമാനം തുകയേ മുറിവാടകയായി നൽകൂ. ഉദാഹരണത്തിന് ഒരു പോളിസിയുടെ സം അഷ്വേഡ് ഒരു ലക്ഷം രൂപയാണെന്ന് കരുതുക. ഈ പോളിസി മുറിവാടകയായി സം അഷ്വേഡിന്റെ ഒരു ശതമാനമേ നൽകൂ എന്നും കരുതുക. അതായത് രോഗി 1000 രൂപ വാടകയുള്ള മുറിയിൽ താമസിച്ചാലേ ക്ലെയിം ലഭിക്കൂ. അസുഖം വന്നാൽ ഓരോരുത്തരുടേയും ജീവിത നിലവാരമനുസരിച്ച് സൗകര്യമുള്ള മുറികളിൽ ആകുമല്ലോ താമസിക്കാൻ ഇഷ്ടപ്പെടുക. സം അഷ്വേഡ് എത്ര വേണമെന്ന് തീരുമാനിക്കുമ്പോൾ ഇതു കൂടി പരിഗണിക്കുക. 5000 രൂപ വാടകയുള്ള മുറിയിൽ താമസിക്കണമെങ്കിൽ മുകളിൽ സൂചിപ്പിച്ച പോളിസിയിൽ അഞ്ചു ലക്ഷം രൂപയായിരിക്കണം സം അഷ്വേഡ്.
∙ പൊതുവായ അസുഖങ്ങൾക്ക്
ചില അസുഖങ്ങൾക്കുള്ള ചികിത്സയ്ക്ക് ചില പോളിസികളിൽ ക്ലെയിം കിട്ടില്ല. ഇത്തരം അസുഖം ഉള്ളവർ അതിനുള്ള ചികിത്സയ്ക്കായി മെഡിക്ലെയിം പോളിസികൾ എടുക്കേണ്ടതില്ല. രക്തസമ്മർദ്ദം, പ്രമേഹം തുടങ്ങിയ രോഗങ്ങൾ ഉദാഹരണമായി പറയാം.
ഹോം നഴ്സിന്റെ സേവനം
കുടുംബത്തിലാരെങ്കിലും അസുഖത്തെ തുടർന്ന് ആശുപത്രിയിൽ ആയാൽ കാര്യങ്ങൾ നോക്കാൻ ചിലർക്ക് പുറമേ നിന്നൊരാളുടെ സഹായം വേണ്ടിവരും. അവർക്ക് അതിനുള്ള വേതനവും വേണ്ടിവരും. തിരിച്ച് വീട്ടിലെത്തുന്നതുവരെ ഹോം നഴ്സിന്റെ സേവനവും വേണ്ടി വന്നേക്കാം. ഇവർ ഇത്തരം കാര്യങ്ങൾക്കുള്ള പണം കൂടി നൽകുന്ന പോളിസികൾ പരിശോധിക്കുക.
പോളിസികളിലെ വ്യത്യാസം
മെഡിക്ലെയിം പോളിസികളും ഹെൽത്ത് ഇൻഷുറൻസ് പോളിസികളും തമ്മിലുള്ള വ്യത്യാസം മനസ്സിലായിരിക്കണം. ജനറൽ ഇൻഷുറൻസ് കമ്പനികൾ (ഓറിയന്റൽ, നാഷനൽ പോലുള്ളവ) പുറത്തിറക്കുന്ന പോളിസികളാണ് മെഡി ക്ലെയിം പോളിസികൾ എന്നറിയപ്പെടുന്നത്. ലൈഫ് ഇൻഷുറൻസ് കമ്പനികൾ (എൽ. ഐ. സി, എച്ച് ഡി. എഫ്. സി. ലൈഫ് പോലുള്ളവ) ആവിഷ്കരിച്ചിരിക്കുന്ന പോളിസികളാണ് ഹെൽത്ത് ഇൻഷുറൻസ് പോളിസികൾ എന്നറിയപ്പെടുന്നത്. സം അഷ്വേഡിനു വിധേയമായി ചികിത്സാ ചെലവ് എത്രയാണ് അത്രയും തുക മെഡിക്ലെയിം പോളിസികളിൽ നിന്ന് ലഭിക്കും.
എന്നാൽ ഹെൽത്ത് പോളിസികളിൽ പോളിസിയുടമ മുൻകൂട്ടി തിരഞ്ഞെടുത്ത ഡെയ്‌ലി കാഷ് ബനിഫിറ്റ് മാത്രമേ ആശുപത്രി വാസത്തിൽ ലഭിക്കൂ. മെഡിക്ലെയിം പോളിസികളിൽ ക്ലെയിം ചെയ്യുന്ന ഓരോ തുകയ്ക്കും കൃത്യമായ ബില്ല് വേണം. ഹെൽത്ത് ഇൻഷുറൻസ് പോളിസികളിൽ ചികിത്സയ്്ക്കായി ആശുപത്രിയിൽ പ്രവേശിക്കപ്പെട്ടതിന്റെ തെളിവ് മാത്രം മതി.
ഫ്ളോട്ടർ അല്ലെങ്കിൽ ഇൻഡിവിജ്വൽ
ഒരു കുടുംബത്തിൽ നാലുപേരുണ്ട് എന്ന് വിചാരിക്കുക. ഇൻഡിവിജ്വൽ പോളിസി ഒരു ലക്ഷം രൂപയുടെ സം അഷ്വേഡിൽ നാലുപേർക്കുമായി എടുക്കുന്നു എന്നു കരുതുക. ഇതാണ് ഇൻഡിവിജ്വൽ മെഡിക്ലെയിം പോളിസി. ഈ പോളിസി പ്രകാരം നാലുപേരിൽ ഓരോരുത്തർക്കും പ്രതിവർഷം ഓരോ ലക്ഷം രൂപയ്ക്കു വരെയുള്ള ചികിത്സയ്ക്കു കവറേജ് ലഭിക്കും.
ഇനി ഇതേ നാലുപേർക്കുമായി ഫാമിലി ഫ്ളോട്ടർ പദ്ധതി നാലു ലക്ഷം രൂപയുടെ സം അഷ്വേഡിൽ എടുക്കുന്നുവെന്ന് കരുതുക. പ്രതിവർഷം കുടുംബത്തിൽ എല്ലാവരുടെയും നാലുലക്ഷം രൂപ വരെയുള്ള ചികിത്സയ്ക്ക് കവറേജ് ലഭിക്കും. അല്ലെങ്കിൽ ഒരാൾക്കു മാത്രം നാലുലക്ഷം രൂപ വരെയുള്ള ചികിത്സയ്ക്കു കവറേജ് ലഭിക്കും. കുടുംബത്തിൽ എല്ലാവർക്കും ഒരുമിച്ച് അസുഖം വരാൻ സാധ്യതയില്ലാത്തതിനാൽ ഫാമിലി ഫ്ളോട്ടർ പോളിസിയാണ് മിക്ക കുടുംബങ്ങൾക്കും അനുയോജ്യം.
എതു പ്രായത്തിൽ ചേരണം
എത്രയും നേരത്തെ ചേരുന്നോ അത്രയും നല്ലത്. പ്രായം കൂടുംതോറും പ്രീമിയവും കൂടും. അറുപതു കഴിഞ്ഞവരെ മെഡിക്ലെയിം പോളിസികളിൽ ചേർക്കാൻ പൊതുവേ കമ്പനികൾക്ക് താൽപര്യം കുറവാണ്. അതുകൊണ്ട് ചെറുപ്രായത്തിൽ തന്നെ നല്ലൊരു മെഡിക്ലെയിം പോളിസിയുടെ സംരക്ഷണം ഉറപ്പാക്കുകയാവും ഉചിതം.