ന്യൂഡൽഹി ∙ കേന്ദ്ര സർക്കാർ ഏജൻസികൾ ഫെയ്സ്ബുക്കിൽ നിന്ന് 2017ൽ വിവരങ്ങൾ ആവശ്യപ്പെട്ടത് 22024 തവണ. യുഎസ് കഴിഞ്ഞാൽ (65,000 തവണ) രണ്ടാം സ്ഥാനത്ത് ഇന്ത്യയാണെന്ന് ഫെയ്സ്ബുക് വ്യക്തമാക്കി. 2016ൽ ഇന്ത്യ ആവശ്യപ്പെട്ടിട്ടുള്ളത് 13,613 തവണയാണ്. നിയമപരമായി നൽകാവുന്ന 53% അപേക്ഷകളിൽ വിവരം കൈമാറി.
ഉള്ളടക്കങ്ങളിൽ 1914 എണ്ണം 2017ൽ തടഞ്ഞു. മുൻ വർഷത്തേതിന്റെ ഇരട്ടിയാണിത്. വിദ്വേഷപ്രസംഗം, വർഗീയപരാമർശങ്ങൾ തുടങ്ങിയവയുമായി ബന്ധപ്പെട്ട ഉള്ളടക്കമാണു വിലക്കിയത്. നിയമപാലന ഏജൻസികളുടെയും കേന്ദ്ര ഐടി, ഇലക്ട്രോണിക്സ് മന്ത്രാലയത്തിനു കീഴിലുള്ള കംപ്യൂട്ടർ എമർജൻസി റെസ്പോൺസ് ടീമിന്റെയും ആവശ്യപ്രകാരമാണിത്.