Activate your premium subscription today
കയ്റോ ∙ യുഎസും അറബ് രാജ്യങ്ങളും നടത്തുന്ന മധ്യസ്ഥ ശ്രമങ്ങൾക്കിടെ ഇസ്രയേൽ ഗാസയിൽ നടത്തിയ വ്യോമാക്രമണത്തിൽ 60 പേർ കൊല്ലപ്പെട്ടു. ഖാൻ യൂനിസിലാണ് ഏറ്റവും കൂടുതൽ പേർ കൊല്ലപ്പെട്ടത്. താൽക്കാലിക ടെന്റുകൾക്കും അഭയാർഥി ക്യാംപുകൾക്കും നേരെയായിരുന്നു ആക്രമണം. യുഎസ് പ്രസിഡന്റ് ഡോണൾഡ് ട്രംപിന്റെ മധ്യപൂർവദേശ സന്ദർശനത്തിനിടെയാണ് ആക്രമണമെന്നതും ശ്രദ്ധേയമാണ്. 1948 ലെ പലായനത്തിന്റെ ഓർമയ്ക്ക് പലസ്തീനുകാർ ‘നഖ്ബ’ ആചരിക്കുന്ന ദിവസമായിരുന്നു ഇന്നലെ. ബുധനാഴ്ച ആക്രമണത്തിൽ 80 പേർ കൊല്ലപ്പെട്ടിരുന്നു.
ഇസ്തംബുൾ (തുർക്കി) ∙ റഷ്യ–യുക്രെയ്ൻ സമാധാന ചർച്ച തുടങ്ങുംമുൻപേ തിരിച്ചടി. യുക്രെയ്ൻ പ്രസിഡന്റ് സെലെൻസ്കിയുമായി നേരിട്ടുള്ള കൂടിക്കാഴ്ചയ്ക്ക് എത്താതിരുന്ന പുട്ടിൻ പകരമയച്ചത് രണ്ടാംനിരയെ. സെലെൻസ്കി അങ്കാറയിൽ പുട്ടിനായി കാത്തിരുന്നതു വെറുതെയായി. അതേസമയം, റഷ്യൻ സംഘം ഇസ്തംബുളിൽ ചർച്ചയ്ക്കെത്തിയെങ്കിലും യുക്രെയ്ൻ പക്ഷത്തുനിന്ന് ആരും ഉണ്ടായിരുന്നില്ല.
ഹേഗ് ∙ ഇസ്രയേൽ പ്രധാനമന്ത്രി ബെന്യാമിൻ നെതന്യാഹുവിനെതിരെ യുദ്ധക്കുറ്റം ചുമത്തിയതിന് യുഎസ് ഏർപ്പെടുത്തിയ ഉപരോധം രാജ്യാന്തര ക്രിമിനൽ കോടതി (ഐസിസി)യുടെ പ്രവർത്തനം താറുമാറാക്കി. മുഖ്യ പ്രോസിക്യൂട്ടർ കരീം ഖാന്റെ ഇമെയിലും ബാങ്ക് അക്കൗണ്ടും മരവിപ്പിക്കപ്പെട്ടു. ഹേഗ് ആസ്ഥാനമായ കോടതിയിലെ അമേരിക്കൻ ജീവനക്കാർക്കു യുഎസിൽ പ്രവേശിക്കുന്നതിന് അറസ്റ്റ് ഭീഷണിയുണ്ട്. യുഎസ് പ്രസിഡന്റ് ഡോണൾഡ് ട്രംപിന്റെ നടപടിമൂലം നീതി നിഷേധിക്കപ്പെടുന്നതായി ഹ്യൂമൻ റൈറ്റ്സ് വാച്ച് ഡയറക്ടർ ലിസ് എവൻസൺ ആരോപിച്ചു.
വാഷിങ്ടൻ∙ ഇന്ത്യയിൽ നിക്ഷേപവുമായി മുന്നോട്ടുപോകുന്നതിനിെട ആപ്പിൾ സിഇഒ ടിം കുക്കിനു മുന്നറിയിപ്പുമായി ട്രംപ്. ഇന്ത്യയിൽ ആപ്പിൾ ഉൽപ്പന്നങ്ങളുടെ നിർമാണം നടത്താൻ താൻ ആഗ്രഹിക്കുന്നില്ലെന്നും ഇന്ത്യയെ പരിപാലിക്കണമെങ്കിൽ ആപ്പിളിന് ഇന്ത്യയിൽ ഉൽപ്പന്നങ്ങൾ നിർമിക്കാമെന്നും ട്രംപ് പറഞ്ഞു. ദോഹയിൽ നടന്ന ബിസിനസ് പരിപാടിയ്ക്കിടെയാണ് ട്രംപ് ആപ്പിളിന് മുന്നറിയിപ്പ് നൽകിയത്. ടിം കുക്കുമായി തനിക്ക് ഒരു ‘ചെറിയ പ്രശ്‌നം’ ഉണ്ടെന്നും ട്രംപ് പറഞ്ഞിരുന്നു.
ദോഹ ∙ അമേരിക്കൻ വിമാനക്കമ്പനിയായ ബോയിങ്ങിൽനിന്ന് ഖത്തർ 160 വിമാനങ്ങൾ വാങ്ങും. 20,000 കോടി ഡോളറിന്റേതാണു കരാർ. യുഎസ് പ്രസിഡന്റ് ഡോണൾഡ് ട്രംപിന്റെ ഖത്തർ സന്ദർശനത്തിനിടെയാണു സുപ്രധാന കരാർ ഒപ്പുവച്ചത്. ബോയിങ്ങിന്റെ ചരിത്രത്തിലെ ഏറ്റവും വലിയ വിൽപനക്കരാറാണിതെന്നു ട്രംപ് പറഞ്ഞു. ട്രംപിന് 40 കോടി ഡോളർ വില വരുന്ന വിമാനം സമ്മാനമായി നൽകുമെന്നും ഖത്തർ പ്രഖ്യാപിച്ചു.
മോണ്ടെവിഡിയോ ∙ ലാറ്റിനമേരിക്കൻ വിമോചനസമര നേതാവും യുറഗ്വായ് മുൻ പ്രസിഡന്റുമായ ഹോസെ മൊഗിക്ക (89) അന്തരിച്ചു. തെക്കേ അമേരിക്കൻ രാജ്യമായ യുറഗ്വായിയിൽ പുരോഗമനപരമായ ഒട്ടേറെ മാറ്റങ്ങൾ കൊണ്ടുവന്ന മൊഗിക്ക, ഗറില്ല പോരാളിയിൽനിന്നാണു ഭരണകർത്താവായത്. 2010–2015 ൽ യുറഗ്വായിയിലെ ഇടതുപക്ഷ സർക്കാരിനെ നയിച്ച കാലത്ത് ലളിതജീവിതംകൊണ്ടു ‘ദരിദ്രനായ പ്രസിഡന്റ്’ എന്നറിയപ്പെട്ടു. ജനങ്ങൾ അദ്ദേഹത്തെ സ്നേഹപൂർവം ‘പെപ്പേ മൊഗിക്ക’എന്നാണു വിളിച്ചത്.
സാൻജോസ് (യുഎസ്)∙ വിരലറ്റത്ത് ഈശ്വരൻ പതിച്ചുവിട്ട ‘ക്യുആർ കോഡ്’ അഥവാ വിരലടയാളം അരനൂറ്റാണ്ടിനുശേഷം കൊലക്കേസ് പ്രതിയെ കുടുക്കി. കലിഫോർണിയയിൽ 1977ൽ ജനറ്റ് റാൽസ്റ്റൺ എന്ന യുവതിയെ കൊലപ്പെടുത്തിയ കേസിലെ പ്രതി വില്ലി യൂജി സിംസിനാണ് (69) ഇരുപത്തൊന്നാം വയസ്സിൽ ചെയ്ത കുറ്റത്തിനു പിടിയിലായത്. തെളിവായത് ജനറ്റ് കൊല്ലപ്പെട്ട കാറിനുള്ളിൽനിന്നു കണ്ടെടുത്ത സിഗരറ്റ് പായ്ക്കറ്റിലെ വിരലടയാളം. ‘പുകവലി ഹാനികരം’ എന്നതിന് ഇതിനോളം വലിയ പരസ്യമില്ല! ഫെഡറൽ ഇൻവെസ്റ്റിഗേഷൻ ബ്യൂറോയുടെ ആധുനിക സംവിധാനംവഴി വിരലടയാളം പരിശോധിച്ചപ്പോഴാണു വില്ലിയാണു വില്ലൻ എന്നു തിരിച്ചറിഞ്ഞത്.
ഇസ്‌ലാമാബാദ് ∙ പാക്കിസ്ഥാന് രാജ്യാന്തര നാണ്യനിധി (ഐഎംഎഫ്) അനുവദിച്ച ധനസഹായത്തിന്റെ രണ്ടാം ഗഡുവായ 102 കോടി ഡോളർ കൈമാറി. ജൂൺ 2ന് അവതരിപ്പിക്കുന്ന പാക്ക് ബജറ്റിനു മുന്നോടിയായുള്ള ചർച്ചകൾക്കായി ഐഎംഎഫ് പ്രതിനിധികൾ നടത്താനിരുന്ന സന്ദർശനം സുരക്ഷാകാരണങ്ങളാൽ വൈകുന്നതിനിടെയാണു തുക അനുവദിച്ചത്. ഓൺലൈൻ ചർച്ചയിൽ രാജ്യത്തെ സാമ്പത്തിക പരിഷ്കരണ നടപടികളിൽ തൃപ്തി രേഖപ്പെടുത്തിയാണ് ഐഎംഎഫ് തുക അനുവദിച്ചതെന്ന് സ്റ്റേറ്റ് ബാങ്ക് ഓഫ് പാക്കിസ്ഥാൻ അറിയിച്ചു. ആദ്യഗഡുവായി 100 കോടി ഡോളർ നൽകിയിരുന്നു.
മെക്സിക്കോ സിറ്റി ∙ ബ്യൂട്ടി, മേക്കപ്പ് വിഡിയോകളുമായി ടിക്ടോക്കിൽ താരമായിരുന്ന മെക്സിക്കോ സ്വദേശി വലേറിയ മാർക്കേസ് (23) ലൈവ്സ്ട്രീമിങ്ങിനിടെ അക്രമിയുടെ വെടിയേറ്റു മരിച്ചു. ഇൻസ്റ്റഗ്രാമിലും ടിക്ടോക്കിലുമായി രണ്ടു ലക്ഷത്തോളം ഫോളോവേഴ്സുള്ള വലേറിയ ജെലിസ്കോയിലുള്ള ബ്യൂട്ടി സലൂണിൽ ചൊവ്വാഴ്ച ലൈവ്സ്ട്രീമിങ് നടത്തുമ്പോഴാണ് ബൈക്കിലെത്തിയ അക്രമി വെടിയുതിർത്തത്. സമ്മാനപ്പൊതി കൈമാറാനെന്ന വ്യാജേനയാണ് ഇയാൾ എത്തിയത്.
വത്തിക്കാൻ സിറ്റി ∙ മധ്യപൂർവദേശത്തും കിഴക്കൻ യൂറോപ്പിലും മതതീവ്രവാദത്തെത്തുടർന്നുള്ള സംഘർഷങ്ങളിൽ പീഡനം അനുഭവിക്കുന്ന ക്രൈസ്തവർക്കിടയിൽ സമാധാനത്തിനായി എല്ലാ ശ്രമവും നടത്തുമെന്ന് ലിയോ പതിനാലാമൻ മാർപാപ്പ ഉറപ്പു നൽകി. പൗരസ്ത്യസഭകളുടെ പാരമ്പര്യം സംരക്ഷിച്ച് ആധ്യാത്മികതയിൽ വളരാൻ മേഖലയിൽ സമാധാനം പുലരണമെന്നും പൗരസ്ത്യ റീത്തുകളായ കോപ്റ്റിക്, കൽദായ, മാരനൈറ്റ്, എറിട്രിയൻ, സിറോ മലബാർ, ഗ്രീക്ക് തീർഥാടകരോട് മാർപാപ്പ പറഞ്ഞു.
Results 1-10 of 3921
