ഒരുമാസം അധ്വാനം; സമാപനം ആഹ്ലാദം: പ്രചാരണ സമാപനം ആഘോഷിച്ച് മൂന്നു മുന്നണികളും
Mail This Article
മല്ലപ്പള്ളി ∙ ഒരുമാസത്തിലേറെയായി ടൗണും ഗ്രാമീണമേഖലകളും ഇളക്കിമറിച്ച് നടന്ന പരസ്യ പ്രചാരണത്തിന് കലാശക്കൊട്ടിലൂടെ സമാപനമായി. ഇനിയുള്ള ഒരുദിവസം നിശബ്ദ പ്രചാരണവുമായി മുന്നണി പ്രവർത്തകർ. സെൻട്രൽ ജംക്ഷൻ കേന്ദ്രീകരിച്ചാണ് എൻഡിഎ, എൽഡിഎഫ്, യുഡിഎഫ് മുന്നണികളുടെയും കലാശക്കൊട്ട് നടന്നത്. പാട്ടിന്റെയും വാദ്യമേളങ്ങളുടെയും അകമ്പടിയിലാണ് പരസ്യപ്രചാരണത്തിന് സമാപനംകുറിച്ചത്.
ഉച്ചയ്ക്കുശേഷം 3 മണിയോടെ തന്നെ ഉച്ചഭാഷിണികൾ വച്ചുകെട്ടിയ വാഹനങ്ങൾ ടൗൺ കേന്ദ്രീകരിച്ചാണ് ഓടിയത്. 3 മുന്നണികളുടെയും പ്രവർത്തകരും എത്തി. കീഴ്വായ്പൂര് സ്റ്റേഷൻ ഹൗസ് ഓഫിസറിന്റെ നേതൃത്വത്തിൽ പൊലീസ് സംഘവും സ്ഥിതിഗതികൾ നിയന്ത്രിച്ചു. ഓരോ മുന്നണിയ്ക്കും നേരത്തെ തന്നെ പ്രത്യേകം സ്ഥലങ്ങളും പൊലീസ് ക്രമീകരിച്ചിരുന്നു. ആറുമണിയോടെ മുദ്രാവാക്യം വിളികളും അനൗൺസ്മെന്റും നിർത്തി.