മരിച്ചവരെ വെന്റിലേറ്ററിൽ കിടത്തുമോ?

ശരീരത്തിലെ അസ്ഥി പൊട്ടിയാൽ ആറാഴ്ച കൊണ്ടു ശരിയായേക്കും. പക്ഷേ തലച്ചോറിനാണു ക്ഷതമെങ്കിൽ പൂർവസ്ഥിതിയിലാകാൻ എളുപ്പമായേക്കില്ല. തലച്ചോറിനെ മറ്റു ഭാഗങ്ങളിൽനിന്നു വ്യത്യസ്തമാക്കുന്നതും അതിന്റെ സങ്കീർണതകളാണ്. പ്രതിരോധശക്തി വളരെ കുറവായതിനാൽ അണുബാധ ഏൽക്കാൻ സാധ്യത ഏറെയാണ്. വയറ്റിനുള്ളിൽ ഒരു മുഴ വന്നാൽ വയർ അതിനനുസരിച്ചു വികസിക്കും. എന്നാൽ അതേ മുഴ തലയ്ക്കുള്ളിലായാൽ പ്രശ്നം ഗുരുതരമാകും. മറ്റേതു ഭാഗങ്ങളിൽ വരുന്ന അസുഖവും തലച്ചോറിനുമുണ്ടാകാം. അപകടമുണ്ടായാൽ പുറമേ മുറിവുകൾ കണ്ടില്ലെങ്കിലും മുട്ട കലങ്ങുന്നതുപോലെ ഉള്ളു കലങ്ങും. എത്ര സമയത്തിനുള്ളിൽ ആശുപത്രിയിലെത്തിക്കുന്നു എന്നതാണു നിർണായകം.

മെട്രോ മനോരമയും അനന്തപുരി ഹോസ്പിറ്റൽ ആൻഡ് റിസർച് ഇൻസ്റ്റിറ്റ്യൂട്ടും ചേർന്നു നടത്തിയ 'ഡോക്ടറോടു ചോദിക്കാം' പരിപാടിയിലാണ് അനന്തപുരി ഹോസ്പിറ്റൽ ചെയർമാനും പ്രശസ്ത ന്യൂറോളജിസ്റ്റുമായ ഡോ. മാർത്താണ്ഡപിള്ള തലച്ചോറുമായി ബന്ധപ്പെട്ട രോഗങ്ങളെക്കുറിച്ചുള്ള പുത്തൻ അറിവുകൾ പങ്കുവച്ചത്. 40 വർഷത്തെ സേവനത്തിനുശേഷം മെഡിക്കൽ കോളജിലെ ന്യൂറോസർജറി മേധാവിയായാണു വിരമിച്ചത്. അനന്തപുരി ആശുപത്രി ന്യൂറോളജി, ന്യൂറോസർജറി വിഭാഗം ഏഷ്യയിലെ തന്നെ മികച്ച കേന്ദ്രങ്ങളിൽ ഒന്നാണ്. പത്മശ്രീയും ഡോ. കെ.സി.റോയി അവാർഡും ലഭിച്ചിട്ടുണ്ട്. അനന്തപുരി ആശുപത്രിയിലെ ഡോ. ടി.വി.അനിൽകുമാർ, ഡോ. കെ.എൽ.സുരേഷ് കുമാർ, ഡോ. പി.ബി.ജോസ്, ഡോ. എം.അജിത്, ഡോ. അനിൽകുമാർ അശോകൻ, ഡോ. തോമസ് വർഗീസ് എന്നിവരും വായനക്കാരുടെ സംശയങ്ങൾക്കു മറുപടി നൽകി.

∙ തലച്ചോറിലെ രക്തസ്രാവത്തിനു കാരണം?

രക്തസമ്മർദമാണു പ്രധാന കാരണം. രക്തക്കുഴലുകളിൽ ജന്മനാ ഉള്ള വൈകല്യവും കാരണമാകാം. കൊളസ്ട്രോൾ, പ്രമേഹം എന്നിവ മൂലം രക്തക്കുഴലിനു കട്ടി കൂടാം. ലഹരി മരുന്ന് ഉപയോഗവും കരൾരോഗവും രക്തസ്രാവത്തിലേക്കു നയിക്കാം. രക്തസമ്മർദം കൂടുമ്പോൾ ശസ്ത്രക്രിയ ചെയ്യുന്നതു സൂക്ഷിച്ചുവേണം; രക്തം ക്ലോട്ട് ചെയ്യുന്നതുമായി ബന്ധപ്പെട്ട പ്രശ്നങ്ങളുണ്ടാകും. ഞരമ്പു പിടഞ്ഞുകിടക്കുന്നതു പൊട്ടാനുള്ള സാധ്യതയും ചിലരിലുണ്ട്. ശസ്ത്രക്രിയയിലൂടെയും കോയിലിങ് എന്ന പുതിയ സാങ്കേതികവിദ്യയിലൂടെയും ഇതിനു പരിഹാരം കണ്ടെത്താം.

∙ അപകടത്തിൽ പെട്ടവർക്ക് പ്രഥമശുശ്രൂഷഎങ്ങനെ?

അബോധാവസ്ഥയിലായ രോഗിക്കു പ്രാണവായു ലഭ്യതയുണ്ടോയെന്നു പരിശോധിക്കണം. അതിവേഗം ശ്വാസോച്ഛാസം ചെയ്യുന്നുണ്ടെങ്കിൽ സൂക്ഷിക്കണം. ഓട്ടോയിലോ കാറിലോ ചുരുണ്ടുകൂടിയ നിലയിൽ കിടത്തിക്കൊണ്ടു പോകരുത്. പകരം സ്ട്രെച്ചറിലോ പലകയിലോ ചെരിച്ചു കിടത്തണം. ഛർദിൽ തൊണ്ടയിൽ കുടുങ്ങാതിരിക്കാനാണിത്. നാഡിയിലെ അനക്കം തിരിച്ചറിഞ്ഞു രക്തസമ്മർദം അളക്കാം. അപകടത്തിൽപെട്ട വ്യക്തിയുടെ വായിലേക്കു വെള്ളം ഒഴിച്ചുകൊടുക്കുന്നതും ശരിയായ രീതിയല്ല.

∙ മൃഗങ്ങളുടെ തലച്ചോർ കഴിച്ചാൽ മനുഷ്യതലച്ചോറിന്റെ ശേഷി കൂടുമോ?

ഒരിക്കലുമില്ല. തലച്ചോർ വളരെ ശ്രദ്ധയോടെ പാചകം ചെയ്തു മാത്രമേ ഉപയോഗിക്കാവൂ. വേവിച്ചു കഴിഞ്ഞാൽ തലച്ചോറായാലും മറ്റേതു ഭാഗമായാലും പ്രോട്ടീനുകളാണ്. ഇവയല്ലാതെ മറ്റൊരു പ്രത്യേക ഗുണവും ലഭിക്കില്ല. തലച്ചോർ സംബന്ധമായ രോഗങ്ങൾ ഒഴിവാക്കാൻ അമിതവണ്ണം ഒഴിവാക്കാം. പച്ചക്കറികൾ കൂടുതലായി കഴിക്കുകയും വേണം.

∙ തലച്ചോറിനെ ബാധിക്കുന്ന വൈറസുകളെക്കുറിച്ച്?

നിലവിൽ ഒന്നോ രണ്ടോ വൈറസുകൾ ഒഴികെ മറ്റൊന്നിനും ആന്റിവൈറൽ മരുന്നുകൾ കണ്ടുപിടിച്ചിട്ടില്ല. പലപ്പോഴും വൈറൽ പനിയാണു മസ്തിഷ്കവീക്കത്തിലേക്കു നയിക്കുന്നത്. അണുബാധ ഉണ്ടാകാതെ നോക്കുകയാണു പ്രധാനം.