ന്യൂഡൽഹി∙ ദക്ഷിണ കൊറിയ പ്രസിഡന്റ് മൂൺ ജേ ഇന്നിന് പ്രധാനമന്ത്രി നരേന്ദ്ര മോദിയുടെ സമ്മാനം, മോദി ധരിക്കുന്നതു പോലെയുള്ള ഓവർകോട്ട്. സമ്മാനത്തിന്റെ കാര്യം മൂൺ തന്നെയാണു ട്വിറ്ററിലൂടെ പുറത്തുവിട്ടത്.
ഇന്ത്യ സന്ദർശിച്ചപ്പോൾ മോദിയോട്, ‘ താങ്കൾ ഈ ഉടുപ്പിൽ നല്ല സ്മാർട്ടായിരിക്കുന്നു’ എന്നു മൂൺ പറഞ്ഞിരുന്നു. പിന്നാലെ, മൂണിന്റെ അളവിൽ തയ്പിച്ച കോട്ടുകൾ മോദി അയച്ചു കൊടുത്തു. അതിലൊന്ന് അണിഞ്ഞുകൊണ്ടുള്ള ചിത്രവും മൂൺ ട്വിറ്ററിൽ പങ്കുവച്ചു.
മൂൺ പങ്കുവച്ച ചിത്രങ്ങളിലൊന്നിൽ ‘മോദി ജാക്കറ്റ്’ എന്ന് എഴുതിയിട്ടുണ്ട്. ഇത് ‘മോദി ജാക്കറ്റ്’ അല്ല ഇക്കാലമത്രയും ‘നെഹ്റു ജാക്കറ്റ്’ എന്നാണ് ഇത് അറിയപ്പെട്ടിരുന്നതെന്നു ചൂണ്ടിക്കാട്ടി ഒട്ടേറെ പേർ ട്വിറ്ററിലെത്തി. ‘എന്റെ സുഹൃത്ത് പ്രസിഡന്റ് മൂൺ ഇന്ത്യൻ ജാക്കറ്റിൽ സുമുഖനായിരിക്കുന്നു. ഇന്ത്യയുടെ ഈ സമ്മാനം താങ്കളുടെ ഹൃദയത്തോട് ചേർന്നിരിക്കുമെന്നു കരുതുന്നു’ എന്നു മോദിയും മറുപടി ട്വീറ്റ് ചെയ്തു.
