ജൽജീവൻ മിഷൻ: പഴയ അപേക്ഷകളിൽ വൻതുക ഈടാക്കി കണക്‌ഷൻ നൽകാൻ ശ്രമം

ആലപ്പുഴ ∙ സബ്സിഡി നിരക്കിൽ ശുദ്ധജല കണക്‌ഷൻ കിട്ടുന്ന ജൽജീവൻ മിഷൻ പദ്ധതി നടപ്പാക്കാനിരിക്കെ ഇടനിലക്കാർ ഇടപെട്ട് പഴയ അപേക്ഷയിൽ വൻതുക ഈടാക്കി കണക്‌ഷൻ നൽകാൻ ശ്രമം. പതിനായിരത്തോളം അപേക്ഷകളാണ് 3 വർഷമായി കെട്ടിക്കിടക്കുന്നത്. പല കാരണങ്ങളാൽ പരിഗണിക്കപ്പെടാതെ പോയ ഗ്രാമീണ മേഖലയിലെ ഈ അപേക്ഷകൾ ജൽജീവൻ പദ്ധതിയിൽപെടുത്താനുള്ള ശ്രമങ്ങൾ ആരംഭിക്കാനിരിക്കെയാണ് തിടുക്കത്തിൽ തുക വാങ്ങി പഴയ അപേക്ഷയിൽ കണക്‌ഷൻ നൽകാൻ ഇടനിലക്കാർ ശ്രമിക്കുന്നതായാണ് ആരോപണം. 

നിലവിൽ 5000 രൂപ മുതൽ 10000 രൂപവരെയാണു സാധാരണ കണക്‌ഷനു ഈടാക്കുക. ജില്ലയിലെ 72 പഞ്ചായത്തുകളിൽ ശുദ്ധജല പദ്ധതിയില്ലാത്ത 9 പഞ്ചായത്തുകൾ ഒഴികെ 63 പഞ്ചായത്തുകളിലും ജൽജീവൻ പദ്ധതി നടപ്പാക്കും. കേന്ദ്ര സർക്കാർ 50 % തുക നൽകുന്ന മിഷൻ പദ്ധതിയിൽ സംസ്ഥാനം 25 % ബാക്കി 15 % പഞ്ചായത്തും നൽകും. 10 % ഉപഭോക്തൃ വിഹിതമാണ്. ഈ 10 %കൂടി നൽകാൻ പഞ്ചായത്തുകൾ തീരുമാനിച്ചാൽ ഗുണഭോക്താക്കൾക്ക് സൗജന്യമായി ശുദ്ധജല കണക്‌ഷൻ കിട്ടും.