പ്രതിഷേധക്കാരെ നേരിടാനെത്തിയപ്പോൾ കണ്ടത് വലയിൽ കുടുങ്ങിക്കിടന്ന ചേരയെ; രക്ഷിച്ച് ചെങ്ങന്നൂർ സിഐ

ചാരുംമൂട് ∙ സമരമുഖത്തു ക്രമസമാധാന പാലനത്തിനെത്തിയ സിഐ വലയിൽ കുടുങ്ങിക്കിടന്ന ചേരയെ രക്ഷിച്ചു. ചെങ്ങന്നൂർ സിഐ ജോസ് മാത്യുവാണ് നൂറനാട് പടനിലം ഏലിയാസ് നഗറിൽ കരിങ്ങാലിച്ചാൽ പുഞ്ചയുടെ ഓരത്ത് കിടന്നിരുന്ന ചേരയെ രക്ഷിച്ചത്.   കെ റെയിൽ പദ്ധതിയുടെ സർവേക്കെത്തിയ ഉദ്യോഗസ്ഥരെ നാട്ടുകാർ തടഞ്ഞതിനെത്തുടർന്നാണ് സിഐ ഉൾപ്പെടെ വൻ പൊലീസ് സംഘം ഏലിയാസ് നഗറിലെത്തിയത്. പ്രതിഷേധക്കാരെ അറസ്റ്റ് ചെയ്തു നീക്കിയ ശേഷം, സർവേക്ക് എത്തിയവരെ കരിങ്ങാലി പുഞ്ചയിലേക്കു കടത്തിവിടുമ്പോഴാണ് ചേരയെ കാണുന്നത്.  മീൻപിടിത്തക്കാർ ഉപേക്ഷിച്ച വലയിലാണ് ചേര കുടുങ്ങിക്കിടന്നത്. ഉടൻ അടുത്ത വീട്ടിൽനിന്നു കത്രിക വാങ്ങി വലമുറിച്ച് ചേരയെ രക്ഷിക്കുകയായിരുന്നു. ഒപ്പമുണ്ടായിരുന്ന സിഐ വി.ആർ.ജഗദീഷും മറ്റ് ഉദ്യോഗസ്ഥരും സഹായത്തിനെത്തി.