അനധികൃതമായി സൂക്ഷിച്ച 100 കിലോ റേഷനരി പിടിച്ചു

കായംകുളം ∙ റേഷൻകടയ്ക്കു സമീപത്തെ മറ്റൊരു മുറിയിൽ അനധികൃതമായി സൂക്ഷിച്ചിരുന്ന 2 ചാക്ക് റേഷനരി സിവിൽ സപ്ലൈസ് വിഭാഗം നടത്തിയ പരിശോധനയിൽ പിടിച്ചെടുത്തു. 50 കിലോഗ്രാം വീതമുള്ള 2 ചാക്ക് അരിയാണ് അനധികൃതമായി സൂക്ഷിച്ചിരുന്നത്. കൊറ്റുകുളങ്ങര 59–ാം നമ്പർ റേഷൻകടയോടു ചേർന്നുള്ള മുറിയിൽനിന്നാണ് അരി പിടിച്ചെടുത്തത്. തിരിമറി നടക്കുന്നുണ്ടെന്ന പരാതിയെത്തുടർന്നായിരുന്നു പരിശോധന. പിടിച്ചെടുത്ത അരി റേഷൻകടയുടെ സ്‌റ്റോക്കിൽത്തന്നെ വരവുവയ്പിച്ചു. ഇവരുടെ ഡിപ്പോസിറ്റിൽ നിന്ന് പിഴ ഈടാക്കുകയും ചെയ്യും. താലൂക്ക് സപ്ലൈ അസിസ്റ്റന്റ് ഓഫിസറുടെ നേതൃത്വത്തിലായിരുന്നു പരിശോധന.