മാന്നാർ ∙ വീടുകളിൽ കച്ചവടത്തിനെത്തിയ യുവാക്കൾക്ക് നേരെ സദാചാര ഗുണ്ടാ ആക്രമണം, 3 പേർ അറസ്റ്റിൽ, ഒരാൾ ഒളിവിൽ. തിരുവല്ലയിലുള്ള മാർക്കറ്റിങ് കമ്പനിയുടെ ജീവനക്കാരായ അശ്വതി, അഖിൽ, ആദർശ് എന്നിവരെയാണ് മാന്നാർ കുരട്ടിക്കാട് നന്ത്യാട്ട് ജംക്‌ഷന് സമീപം നാലംഗ സംഘം മർദിച്ചത്. കുരട്ടിക്കാട് കാണിച്ചേരിൽ കിഴക്കേതിൽ ബിനീഷ് (36 ), അക്ബർ മൻസിൽ അക്ബർ (35 ), കുട്ടംപേരൂർ പുളിക്കാശേരിൽ കണ്ടത്തിൽ സുമേഷ് (34 ) എന്നിവരെയാണ് മാന്നാർ പൊലീസ് അറസ്റ്റ് ചെയ്തത്. ഒരാൾ ഓടി രക്ഷപ്പെട്ടു. ആക്രമിക്കപ്പെട്ടവർ ആശുപത്രിയിൽ ചികിത്സ തേടി. ഇവരുടെ പരാതിയുടെ അടിസ്ഥാനത്തിലാണ് പൊലീസ് കേസെടുത്തത്.