കുമാരപുരം നിക്ഷേപത്തട്ടിപ്പ്: ഒരു കേസ് കൂടി റജിസ്റ്റർ ചെയ്തു
Mail This Article
മുതുകുളം∙ കുമാരപുരം എരിക്കാവിലെ ഗുരുദേവ ഫിനാൻസ് ആൻഡ് ഇൻവെസ്റ്റ്മെന്റ് എന്ന ധനകാര്യ സ്ഥാപനത്തിലെ നിക്ഷേപത്തട്ടിപ്പുമായി ബന്ധപ്പെട്ട് ഒരു കേസ് കൂടി തൃക്കുന്നപ്പുഴ പൊലീസ് സ്റ്റേഷനിൽ റജിസ്റ്റർ ചെയ്തു. 16 ലക്ഷം രൂപ നഷ്ടപ്പെട്ടതായാണ് പരാതി. ഇപ്പോൾ 53 പരാതികളിൽ തൃക്കുന്നപ്പുഴ പൊലീസ് കേസ് എടുത്തിട്ടുണ്ട്. ഈ കേസുകളിൽ 6 കോടി 32 ലക്ഷം രൂപ നഷ്ടപ്പെട്ടതായാണ് കണക്ക്. കേസ് ക്രൈംബ്രാഞ്ചിന് കൈമാറിയതോടെ പരാതിക്കാർ കൂടുകയാണ്.
ജില്ലാ ക്രൈംബ്രാഞ്ച് ഡിവൈഎസ്പിക്കാണ് അന്വേഷണ ചുമതല. കായംകുളം ഡിവൈഎസ്പി സബ് ഡിവിഷന്റെ പരിധിയിലെ 6 പൊലീസ് സ്റ്റേഷനുകളിലെ എസ്എച്ച്ഒമാരെ കൂടി അന്വേഷണ സംഘത്തിൽ ഉൾപ്പെടുത്തിയിട്ടുണ്ട്. തൃക്കുന്നപ്പുഴ പൊലീസ് സ്റ്റേഷനിൽ റജിസ്റ്റർ ചെയ്ത കേസുകൾ അഞ്ച് സ്റ്റേഷനുകളിലേക്ക് കൂടി വീതിച്ച് നൽകിയിരുന്നു. ഈ സ്റ്റേഷനുകളിലെ ഉദ്യോഗസ്ഥരാണ് ധനകാര്യ സ്ഥാപനത്തിൽ പരിശോധന നടത്തി രേഖകൾ ശേഖരിച്ചത്.